По пожарот што претпладнево изби во Универзалната сала, две женски лица биле однесени на Токсикологија, потврди за МИА професор доктор Нико Беќаровски од оваа клиника.
Класично повредени, нема. Има само две женски лица, на средни години, кои се донесени поради мала изложеност на гасови, од соседната зграда. Тие во моментот на настанот, излегле до балкон на кратко, отвориле врата. Станува збор за мала количина на гас. Лицата се добри, по неколкучасовна опсервација ќе бидат пуштени дома, појасни Беќаровски.
Командирот на скопската Бригада за противпожарна заштита Звонко Томески изјави дека уште не се познати причините за пожарот што претпладнево избувна во Универзалната сала во Скопје. Како што рече, причините дополнително ќе ги утврди полициската екипа. Тој напомена дека нема повреденизатоа што во моментот немало градежни работи.
Томески рече дека за кратко време пожарот бил ставен под контрола иако имале висока температура во самиот објект. Како што посочи, вкупно интервенирале со девет противпожарни возила и 24 пожарникари.
-Во 9 часот и 50 минути пријавена е дојава за настанат пожар во Универзална сала. Веднаш беа испратени две противпожарни возила од блискиот потцентар во населбата Тафталиџе коишто уште при доаѓањето забележаа висок столб од чад и веднаш побараа дополнителна помош. За релативно кратко време и благодарение на пожртвуваноста на колегите пожарот беше ставен под контрола иако имавме висока температура во самиот објект. Би сакал да се заблагодарам и на полициските службеници кои ни овозможија побрзо да пристигнеме, како и на јавните претпријатија „Комунална хигиена“ и „Водовод“ кои се потрудија континуирано да не снабдуваат со вода за да интервенцијата биде што е можно поуспешна, рече Томески.
„Пожар избувна во Универзална Сала при што веднаш се упатив на терен. Во моментов екипите на противпожарната бригада го гаснат и пожарот е локализиран. Не постои опасност по другите објекти во близината. Според првичните информации немало никој во зградата. Апелирам граѓаните да го избегнуваат овој дел од градот додека трае интервенцијата. Исто така апелирам да не се шират шпекулации додека да се добијат официјални информации што е причината за пожарот“, пишува Герасимовски.
Министерката за култура Бисера Костадиновска Стојчевска во објава на Фејсбук, истакна дека на терен се и надлежни органи и стручни лица. Очекуваме првични информации во врска со утврдување на причините за пожарот, обемот на штетата и евентуалната одговорност.
Таа нагласи дека надворешната челична конструкција е противпожарно заштитена и дека салата е осигурана.
„Апелирам до институциите за брзо постапување, да се утврдат фактите што е можно поскоро. Она што е сигурно е дека Скопје ќе има нова Универзална сала. Денешниот инцидент нема да нѐ премисли да се откажеме“, објави министерката Бисера Костадиновска Стојчевска“, потенцира стојчевска.
Пожарот кој ја зафати Универзалната сала како што може да се види и од фотографиите, не и наштети на новата конструкција која остана нечепната.
Министерката за култура, Бисера Костадиновска-Стојчевска во неколку наврати побара да се забрза тој процес, токму од безбедносен аспект, да не се дозволи проектот да биде загрозен со тоа што на него подолго време не се работи.
На крајот на минатиот месец, беше поставена нова купола на Универзалната сала, кога продолжи да се реконстуира објектот, откако салата беше преземена од страна на Министерството за култура.
Во проектот е предвидено целосно ново уредување на внатрешноста, но останува да се види колкави се штетите и дали и колку пожарот ќе го одложи финализирањето на реновирањето на Универзалната сала.
МВР денеска соопшти дека се приведени тројца градежни работници кои изведувале работни задачи во моментот на пожарот во Универзална сала во Скопје.
– Во врска со пожарот, во ПС ОН Центар се приведени тројца градежни работници кои изведувале работни задачи во моментот на пожарот и тоа Б.Р. (50), З.Т. (60) и Б.И. (53). Се преземаат мерки за расчистување на случајот, се наведува во соопштението од МВР.
Ј. Ѓ.
