По неколку месеци одложување, Претставничкиот дом на американскиот Конгрес е подготвен да гласа овој викенд за пакети американска воена помош за Украина и Израел во вредност од десетици милијарди долари.
Како што пренесува Би-Би-Си, двата предлога имаат гласни противници во Конгресот, а надежите за донесување на овие одлуки зависат од кревката двопартиска коалиција која треба да ги надмине процедуралните и законодавните пречки.
Претседателот на Претставничкиот дом, кој е под контрола на републиканците, Мајк Џонсон, изјави дека е решен да го изнесе ова прашање на гласање, дури и ако тоа може да ја загрози неговата позиција како претседател.
Гласањето за Украина внимателно ќе се следи во Кијив, кој со месеци предупредува на итната потреба од ново оружје, додека Русија истовремено напредува на фронтот.
Претставничкиот дом треба да гласа за конечното одобрување вечерва по наше време, а Сенатот под контрола на демократите може многу брзо да го одобри пакетот, можеби веќе овој викенд. Претседателот Џо Бајден вети дека ќе го потпише законот.
Предложениот пакет помош од Џонсон предвидува 60,8 милијарди долари за Украина, 26,4 милијарди долари за Израел и 8,1 милијарди долари за индо-пацифичкиот регион, вклучувајќи го и Тајван. Претставничкиот дом ќе гласа за секој пакет поединечно, со што се зголемува можноста некои делови да бидат одобрени, а други не.
Што и да биде усвоено, ќе се спои во единствен нацрт-закон што ќе треба да го одобри Сенатот како целина пред да стигне до претседателот Бајден за негов потпис.
Џонсон, исто така, вети дека ќе воведе нацрт-закон за имиграциска реформа што ќе содржи одредби што ги фаворизираат конзервативните републиканци во обид да ја добие нивната поддршка за пакетот помош.
Но, се чини дека законот за границата нема да помине бидејќи ќе бара поддршка од две третини од Претставничкиот дом, пишува Вашингтон пост.
Анкетите покажуваат дека се поголем број републиканци се против каква било нова помош за Украина. Некои демократи и либерали се против воената поддршка за Израел. Иако тоа не го спречи Сенатот во февруари да усвои закон кој содржеше поддршка за двете земји, тоа е сосема поинаква приказна во Претставничкиот дом.
Џонсон има тенко мнозинство во Претставничкиот дом, а неколку порадикални републиканци и конзервативци најавија дека ќе ја поддржат неговата смена доколку гласаат за нова помош за Украина. Овие напори ги предводи конгресменката од Џорџија и теоретичар на заговор Марџори Тејлор Грин, а со неа се и Томас Маси од Кентаки и Пол Госар од Аризона.
Досега, претседателот на Претставничкиот дом, Џонсон не сакаше да ги предизвика своите десничарски критичари. Во средата, сепак, тој се предомисли, велејќи дека неговата цел е „да ја направи вистинската работа“.
Во меѓувреме, некои демократи кои се против израелската војна во Газа тврдат дека нема да дозволат САД да бидат соучесници во конфликтот за кој велат дека е хуманитарна катастрофа. Актот за помош на Израел вклучува и хуманитарна помош од 9 милијарди долари, што може да придобие некои демократи.
Дозволувајќи одделни гласања за помошта за Израел и Украина, Џонсон се надева дека ќе им дозволи на пратениците да гласаат против одредбите што не им се допаѓаат без да пропадне целиот предлог-закон.
Администрацијата на Бајден предупредува дека ситуацијата во Украина е страшна. Армијата е при крај со муниција, а моралот е низок бидејќи руската армија го освојува теренот. Проблемите со недостиг на квалитетна противвоздушна одбрана се познати веќе подолго време.
„Постои многу реален ризик Украинците да ја загубат војната до крајот на 2024 година или да го доведат рускиот претседател Владимир Путин во позиција во која тој би можел да ги диктира условите на конфликтот“, изјави директорот на ЦИА Вилијам Барнс во текот на говорот во четвртокот.
Украинскиот премиер Денис Шмихал истакна дека на неговата нација и е потребна помош „вчера, не денес или утре“ и предупреди дека Украина ќе падне без американска помош.
„Ова е клучен момент“, рече Џо Бајден во средата.
Во четвртокот вечерта, демократите им се придружија на поумерените републиканци за да обезбедат дека законот за помош ќе ја отстрани огромната процедурална пречка и покрај несогласувањето во конзервативните редови.
Вчера, слична коалиција на демократи и републиканци кои поддржуваат помош во целиот дом гласаа со 316-94 за почеток на дебатата и конечното гласање за законот попладнево по американско време. Таквото мнозинство е позитивен показател дека гласањето за пакетот помош за Украина е на добар пат да биде усвоено.
Од украинска перспектива, овој напор на демократите би бил многу профитабилен.
Г. Т.
