Според актуелниот Закон за локална самоуправа во општините Сарај и Гостивар, треба да се одржат предвремени парламентарни избори, додека во случај градоначалникот на Oпштина Аеродром, Тимчо Муцунски, да премине во извршната власт, тогаш и во оваа општина мора да се одржат предвремени локални избори.
Според Изборниот законик, функцијата пратеник и министер е во конфликт со функцијата градоначалник на општината.
Согласно законот за локална самоуправа, доколку има повеќе од шест месеци до редовните локални избори, кои се очекува да се одржат во октомври 2025 година, тогаш се организираат предвремени избори за градоначалник, а постојниот општински совет продолжува да функционира до одржувањето на редовните локални избори.
– Претседателот на Советот на општината мора во рок од 15 дена да го информира министерот за локална самоуправа за фактичката состојба во општината по преземањето на градоначалникот на друга функција која е во спротивност со функцијата на градоначалникот, а потоа министерството ja информира Владата за понатамошните чекори. Владата ја констатира состојбата и според законот – или назначува вршител на должноста градоначалник или ја известува Државната изборна комисија за организирање на предвремени избори. Според законот, доколку има повеќе од шест месеци до одржувањето на редовните локални избори, тогаш се организираат предвремени локални избори, објасни за „Фронтлајн“, Адмир Шабани – портпарол на ДИК.
На градоначалникот на општина Сарај, Блерим Беџети му е верифициран пратеничкиот мандат, а тој самиот најави дека ќе ја напушти функцијата прв човек на општината, продолжувајќи го политичкото патување како пратеник, со што Сарај ќе треба да избере нов градоначалник. Од друга страна, името на градоначалникот на Гостивар – Арбен Таравари се „шушка“ како следен министер за здравство, а доколку тој се согласи да биде министер, треба да се одржат и предвремени локални избори и во оваа општина.
Како дел од кабинетот на идниот премиер Христијан Мицкоски, во политичката кругови се споменува и името на градоначалникот на Аеродром, Тимчо Муцунски. Ако стане министер, и Аеродром останува без градоначалник. За пратеник во новиот пратенички состав е избран и градоначалникот на општина Тетово – Билал Касами, но тој се откажа од пратеничкиот мандат.
„Фронтлајн“ од доброупатени извори од партиите на новото парламентарно мнозинство дознава дека новата Влада ќе предложи измени на Законот за локална самоуправа во делот каде што е наведено дека доколку има повеќе од шест месеци, што во конкретниот случај е повеќе, додека не се одржат редовни локални избори треба да се одржат предвремени избори наместо да се именува в.д. градоначалник.
Доколку се направи оваа промена тогаш во овие три општини нема да има предвремени локални избори, туку ќе се чекаат регуларните, додека општините ќе ги водат вршители на должност градоначалници кои ќе ги определи Владата.
Дестан Јонузи
