Пишува: МИЛУТИН РИСТЕСКИ
Вчерашното шверцерско усвојување на спорниот Детален урбанистички план за Лисиче е голем срам пред сè за Тимчо Муцунски и мнозинството на ВМРО-ДПМНЕ во Советот на Општина Аеродром. Тоа е изневерување на довербата на најмалку 1.500 жители на Лисиче, но и на најмалку 18.000 жители на Аеродром кои во 2021 година го дадоа својот глас за Тимчо Муцунски. Особено заради фактот што оваа доверба беше потврдена и пред неполн месец со точно 1.960 гласа за ДПМНЕ во населба Лисиче и 24.594 во Општина Аеродром.
16 членови на Советот на Општина Аеродром (од ВМРО-ДПМНЕ и нивните коалициони партнери од СП, ДПСМ, ГРОМ, ДС и Десница) гласаа за ДУП со кој се овозможува изградба на висококатница од 12 ката поделена на 2 ламели на влезот на Лисиче, една од најубавите населби во Скопје.
Со тоа ВМРО-ДПМНЕ во Аеродром направи избор и застана зад интересите на градежната мафија во Аеродром, а против интересите на нашите сограѓани од Лисиче.
Муцунски својот градоначалнички мандат го започна со иницијатива за бришење на градежна маркица, а го завршува со ДУП кој отвора врата за бетонизација на Лисиче, но и на цел и Аеродром.
Трагедијата да биде поголема, паркот на 5.000 квадрати кој требаше да никне на местото на „избришаната“ маркица, сè уште не е готов. Не успеа да го заврши за своите 3 години од мандатот. Но затоа градоначалникот во заминување и иден министер во владата на ДПМНЕ и ВРЕДИ успеа да донесе ДУП и да ја забетонира судбината на жителите на овој дел од Аеродром.
Огромна благодарност до моите колеги од советничката група на СДСМ и ВМРО-НП, но и до советниците на Левица, советникот на ЗНАМ и независниот советник Масларковски кои останаа доследни во своето ветување и со својот глас застанаа ПРОТИВ усвојувањето на овој ДУП. За жал нашите 11 гласа ПРОТИВ се помалку од 16 гласа ЗА. Но, ова треба да се има на ум на следните локални избори.
Дека оваа одлука е срам за ДПМНЕ говори и фактот што видео материјалот од седницата од кој јасно се гледа како јас и моите колеги од Советот, Љупчо, Горан и Дарко гласно дискутираме против усвојувањето на овој ДУП, Тимчо Муцунски и советниците на ДПМНЕ и коалицијата молчеа и не изустија ниту збор во одбрана на ДУП-от кој го усвоија со 16 гласа ЗА. И ова треба да се има на ум на следните локални избори.
Да не остане незабележано, согласноста за ДУП-от е потпишана од стручна комисија во министерството за транспорт и врски, на 28.05.2024 година, ден пред седницата на Советот на Општина Аеродром. Се поставува прашањето зошто оваа согласност од комисијата не можеше да го почека новиот министер за транспорт и врски? И зошто дигиталните потписи на комисијата се ставени на самиот крај на работното време на 28.05.2024 г., по верификацијата на пратеничкиот мандат на претходниот министер?
По усвојувањето на ДУП-от за Лисиче, Државната комисија за спречување на корупција, Уставниот суд и Јавното обвинителство очигледно ќе имаат полни раце работа. Да ја истражат сопственоста на катастарските парцели 1999/1, 1999/3, 2000/1, 2000/2, 2001/2, 2001/4, 2001/5, и 2001/6 најмалку 2 години наназад. Да истражат кои се аргументите за добивање на согласноста и мислењата на институциите Град Скопје, НОМА Гас и Министерството за транспорт и врски. Да го укинат ДУП-от како неуставен по примерот на укинувањето на ДУП-ови со слични недостатоци, од другата страна на булевар Србија. Да го испитаат законитоста на ваквата постапка во период на нецелосно заокружен изборен процес.
Јас лично, заедно со членовите на Советот од редовите на СДСМ, стоиме на располагање на граѓаните за секаква поддршка во вршењето на јавниот притисок за укинувањето на овој ДУП и го поддржуваме протестот на граѓаните закажан за денес во 18:30 пред Општина Аеродром!
На власта предводена од ВМРО-ДПМНЕ мора да ѝ се испрати јасна порака дека Аеродром, а особено Лисиче, не заслужи ваков почеток на мандат. На сите учесници во ова злосторство наречено ДУП ЈИ 09.01 мора да им се испрати јасна порака дека одговорноста секогаш има име и презиме!
