На фотографиите од денешната средбата на претседателката Гордана Сиљановска Давкова со бугарскиот претседател Румен Радев во Софија, се забележува дека нема македонско знаме, покрај знамето од Бугарија и ЕУ.
„Без маски ама и без македонско знаме. Македонија горда“, забележува Марјан Забрчанец во објава на Фејсбук.
Забрчанец прави фото споредба од тоа како била пречекана во Софија, Сиљановска Давкова, а како претходно од Радев биле пречекани македонските премиери Заев и Ковачевски. Од фотографиите се забележува дека покрај Заев и Ковачевски стои македонското знаме.
Во соопштението од кабинетот на претседателката издадено по средбата, се вели дека со бугарскиот претседател се разговарало за потребата од засилен развој на македонско-бугарските односи, за надминување на отворените прашања меѓу двете земји, за текот на пристапниот процес за членство во Европската Унија и искористување на бугарските искуства на тој пат, како и за можностите за поттик и унапредување на билатералната соработка во повеќе области. Оттаму нема реакција зошто го немало македонскот знаме на официјалната средба.
Сиљановска Давкова по средбата рече дека денеска не разговарале за прашањето на внесување на Бугарите во Уставот, ниту за други конкретни прашања.
Во врска со нејзиниот став за промената на Уставот, Сиљановска Давкова рече дека одлуките за овие прашања ги носат пратениците во Парламентот и не зависат од ставови на поединци.
– Вклучувањето на Бугарите во Уставот не зависи од мене. Јас да сум апсолутен монарх можам да го сменам Уставот, но пратениците ги претставуваат граѓаните, гласаат по сопствено убедување. Не можам да ја суспендирам парламентарната демократија, но се разбира дека разговаравме за сите прашања, велам разговаравме, бидејќи ние не може да донесме решение, ниту да го наметнеме на останатите и на нацијата. Но, разговаравме и тоа е здраво, изјави претседателката Гордана Сиљановска Давкова по средбата во Софија со шефот на бугарската држава Румен Радев.
Ј. Ѓ.
