Последната епизода од сапуницата на Владата наречена „Есенска кошничка“ ни донесе нови изненадувања и потврда дека Владата апсолутно нема ниту концепт, но нема ни желба да ги намали цените на производите кои вртоглаво растат, реагираат со соопштение СДСМ.
Оттаму велат дека „намалувањето на маржите само на околу 100 производи не е никакво конкретно решение, ниту ќе има сериозен ефект на намалувањето на цените. После мачкањето очи на граѓаните со намалувањето на цените за фломастерите и моливите откако започна учебната година, ова е нова манипулација без никаков ефект кое има за цел само кратко да го смири гневот на јавноста, истакнуваат од СДСМ.
„СДСМ во време на сите кризи во изминатите години имаше конкретни и ефективни решенија. Цените беа намалувани за преку 500 производи за исхрана, но се држеа под контрола и цените на останатите производи и на енергенсите. Ова е вистинска грижа и концепт за заштита на стандардот на граѓаните, а не половични решенија кои нема да имаат никаков ефект. Ако Владата не знае, тогаш СДСМ ќе даде конкретен предлог закон со кој проверено ќе заштедат сите граѓани и ќе се амортизира ценовниот шок, додека компаниите нема да сносат штети“, се наведува во соопштението од СДСМ.
Министерот за економија Бесар Дурмиши денеска истакна дека цените нема да се замрзнат, туку маржата ќе се ограничи до 10 отсто
– Цените нема да се замрзнат, туку ќе се ограничи бруто профитната маржа на стотина основни прехранбени производи до 10 отсто, соопшти денеска министерот за економија и труд Бесар Дурмиши.
Како што информира Дурмиши, за оваа мерка Владата најверојатно ќе дискутира на следната седница идната недела. Со мерката ќе бидат опфатени лебот, пекарски и млечни производи, овошје, зеленчук,…
-Оваа мерка ќе биде краткорочна и во сила еден месец. Праксата на нејзиното донесување ќе продолжи за новогодишните и сите следни празници, истакна министерот.
Премиерот Христијан Мицкоски за Законот за нефер трговски практики што треба да стапи во сила од 28-ми овој месец, денеска рече дека доколку не добијат конечен став од бизнис секторот, ќе се оди според предвидената динамика.
J. Ѓ.
Поврзано:
Министерот за економија Дурмиши: Цените нема да се замрзнат, маржата ќе се ограничи до 10 отсто
