Здружението на новинарите на Македонија (ЗНМ) го осудува непрофесионалното и недолично однесување на пратеникот на ВМРО-ДПМНЕ, Драган Ковачки, кој ја попречувал новинарката од онлајн медиумот СакамДаКажам.мк, Соња Делевска, додека ја вршела нејзината професионална работа во Собранието.
Новинарката Делевска, како што известува во дописот до ЗНМ, ја извршувала својата професионална должност и поставувала легитимни прашања до директорот на Агенцијата за национална безбедност, Бојан Христовски. Додека Христовски одговарал на прашањата на Делевска, во врска со неговиот сертификат за англиски јазик, пратеникот Ковачки и се обратил со зборовите: „исклучи го микрофончето, снимаш“ и воедно покажувал на нејзиниот телефон. Делевска го понудила својот телефон на пратеникот, по што тој одбил да го земе и го повикал Христовски да си замине.
„Ги повикуваме сите политички претставници да покажат соодветно ниво на почит и конструктивен однос кон медиумите и нивните претставници, да одговараат редовно на нивните прашања, и да се воздржат од какви било форми на притисок и клевети.
Потсетуваме дека слободата на медиумите и правото на новинарите да поставуваат прашања се основни принципи на демократското општество. Секој обид за попречување, заплашување или дискредитација на новинарите претставува директен напад врз слободата на изразување и транспарентноста на институциите.
ЗНМ ќе продолжи будно да ја следи состојбата со правата на медиумските работници и да се залага за заштита на професионалните новинарски стандарди“, се наведува во соопштението на ЗНМ.
Пратеникот Ковачки вели внимателно ги следел објавите во медиумите за овој случај.
„Внимателно ги следам објавите на медиумите во кои ме обвинуваат дека сум ја обвинил новинарката Соња Делевска дека при поставување на прашања во ходник на директорот на АНБ, снима со телефонот. Посочената новинарка никогаш претходно не сум ја видел ниту сум имал било каков претходен контакт со неа. Молам да бидеме достоинствени во известувањето затоа што тенденциите за оцрнување се прилично очигледни. Отсекогаш сум се залагал за најширока транспарентност и сум имал коректен однос со новинарите. Но, не е во ред да се настапува со теза која е потврдена само од новинарот. Доколку новинарката е навредена од мене иако за тоа нема никаква причина, јас еве јавно и се извинувам. *за погрдните и омаловажувачки зборови кои беа упатени кон мене од новинарката, а за што има сведоци, не барам извинување“, напиша на Фејсбук пратеникот Ковачки.
И опозициската СДСМ „го осудува недоличното однесување на пратеникот од ВМРО-ДПМНЕ Драган Ковачки кој во Собранието попречувал новинари да земат изјава од партиски назначениот директор на АНБ, Бојан Христовски, не дозволувал да му се поставуваат прашања и грубо ги клеветел новинарите“.
„Ова однесување многу потсетува на режимското време на ВМРО-ДПМНЕ и односот кон новинарите и претставува напад врз слободата и вредностите на едно демократско општество. Јасно е дека матрицата на оваа партија не е променета. Секој обид за попречување, заплашување или дискредитација на новинарите претставува директен напад врз слободата на изразување. Драган Ковачки и ВМРО-ДПМНЕ треба да излезат и да јавно да им се извинат на новинарите“, се наведува во соопштението од СДСМ.
Ј. Ѓ.
