Јужнокорејскиот претседател Јун Сук-Јол рече дека му е „многу жал“ што предизвикал загриженост и непријатности со воената состојба што ја прогласи претходно оваа недела и вети дека нема да се обидува повторно да ја наметне.
Претседателот јавно се извини во националното телевизиско обраќање до нацијата, неколку часа пред Парламентот да гласа за негово отповикување.
Јун рече дека нема да се обиде да ја избегне правната или политичката одговорност за прогласувањето на воената состојба, додавајќи дека ќе ги следи насоките на неговата партија за решавање на политичката криза предизвикана од неговиот потег, вклучително и „за прашања поврзани со неговиот престој на функцијата“.
Говорот беше прво јавно појавување на претседателот откако воведе шестчасовна воена состојба, која тој самиот ја укина поради притисокот од Парламентот.
„Навистина ми е жал и би сакал искрено да им се извинам на луѓето кои беа шокирани“, изјави Јун Сук-Јол.
По изјавата на шефот на државата, шефот на владејачката Народна партија Хан Донг-ху рече дека претседателот повеќе не може да ги извршува своите јавни должности и дека неговата оставка сега е неизбежна.
Најмалку 150.000 демонстранти против претседателот Јун се пред Парламентот во Сеул
Најмалку 150.000 луѓе се собраа денеска пред Парламентот во јужнокорејската престолнина Сеул, според јужнокорејска новинска агенција, за да побараат оставка од претседателот Јун Сук-Јол.
Во зградата на Законодавниот дом, пратениците почнаа да гласаат за предлогот за отповикување на Јун.
Поврзано:
