Се чини дека политичкото его е многу голем проблем во Бугарија, потребна ни е редовна влада. Тоа го изјави лидерот на бугарската партија, ГЕРБ, Бојко Борисов, на денешните консултации со шефот на државата Румен Радев пред врачувањето мандат за формирање кабинет.
Борисов посочи дека оваа недела првата политичка сила (од последните парламентарни избори) ќе направи „се што е можно за да ги убеди колегите“ за потребата од редовна влада.
„Ветивме дека ќе направиме напоири, ќе се потрудиме“, рече Бојко Борисов, јави БТА.
На прашањето на шефот на државата Румен Радев кога ГЕРБ-СДС очекува да го добие првиот мандат, Борисов одговори: „Оваа недела е за консултации. Од понеделник натаму, ако ви дозволува распоредот, можеме да одиме на прв термин. Ако не се согласуваме оваа недела, нема да се разбираме следната“.
„Можам да ве уверам дека гледајќи ја меѓународната ситуација и што треба да се одлучи во Бугарија – буџетски и геостратешки проекти, потребна ни е редовна влада. Буџетот без редовна влада ќе биде ист како што видовме во изминатите години, а тоа се огромни дефицити, огромни трошења, а во исто време нема мерки за сето ова да се запре“, додаде Бојко Борисов.
