Пишува: ИВОН ВЕЛИЧКОВСКИ
Порака до српските студенти и средношколци: Браво дечки! Порака до нивните родители: Kапа долу, сте воспитале граѓани по душа и патриоти по суштина!
Слободарските граѓани во Северна Македонија ги разбираат причините за вашите протести и ве поддржуваат во остварувањето на вашите легитимни и темелни барања: Одговорност за жртвите во новосадската трагедија низ правна постапка.
Затоа што на тој начин спречувате нови жртви на импровизација заради политички поени. Затоа што сакате вредностите кои ги стекнувате дома и на школо да не бидат погазени со партиска одлука. Затоа што излегувате од зоната на комфорот што ви ја нудат со буџетски субвенции – од ваши и пари на вашите родители.
Ќе ги разберете, затоа и петте причини за нервозата што ја предизвикавте со вашите протести и кај провладините медиуми и провладините „инфлуенсери“ во Северна Македонија:
- Вашите протести се изворни. А толку би сакале да ги наречат „само уште еден антивладин протест во Србија“.
- Вие давате отпор кон нефункционалноста на системот нагазен од политичка корупција, која живее низ нестручност и партиско договарање „под житото“.
- Со тоа што не дозволивте партиска контаминација на вашите граѓански, морални и општествени вредности – им одржувате лекција и на возрасните и на политичарите – во Србија, но и во регионот;
- Барајќи владеење на правото се спротивставивте на неправдата – и ги придобивате сите кои ја имаат истата цел од партиите, академиите, образованието, уметниците, спортистите…
- Вие само ја барате вашата сегашност и иднина во уредена држава. Ништо повеќе и ништо помалку.
Едноставно, ги распаметивте оние кои сакаат се да се одвива „како и до сега“.
И тука во Северна Македонија се плашат од симпатиите за вас од истата причина – затоа што свесните граѓани го бараат владеењето на правото, а владеењето на правото ги ништи корупцијата, нискиот стандард на живеење и авторитаризмот.
Затоа што не барате замена, туку промена.
Поддршката што ја добивте од вашите колеги во скопскиот Универзитет кај нас медиумите ја премолчаа.
Нивната поддршка, како и поддршката од секој од нас граѓани на Северна Македонија определени за демократија – не зависи од медиумите блиски до партијата и олигархијата.
Затоа, знајте, ве разбираме и – поддржуваме. Вас, студентите и средношколците, вашите родители и оние што ви се придружуваат без калкулации за дневен профит.
