Во Грузија денеска е инаугуриран Михаил Кавелашвили лојалист на владејачката партија за претседател и покрај тоа што неговиот избор беше прогласен за „нелегитимен“ од лидерката во заминување и опозициските групи.
Екстремно десничарскиот поранешен фудбалер положи заклетва на парламентарна церемонија неколку моменти откако претседателката во заминување Саломе Зурабишвили вети дека ќе се бори против партијата Грузиски сон што го контролира Парламентот.
Илјадници луѓе учествуваат на протестите во Грузија пред денешната заклетва на Кавелашвили, додека претседателката во заминување Саломе Зурабишвили одбива да се повлече од функцијата, тврдејќи дека изборите биле нелегитимни.
Демонстрантите пред претседателската палата носат знамиња на ЕУ и извикуваат „Грузија!“.
Многумина се држеа за оградите на претседателската палата, која беше украсена со големо грузиско и знаме на ЕУ.
Зурабишвили и демонстрантите го обвинија Грузиски сон за местење на парламентарните избори во октомври, барајќи ново гласање. Тие велат дека ова ја прави инаугурацијата на Кавелашвили нелегитимна.
„Останувам единствениот легитимен претседател“, им рече Зурабишвили на илјадниците про-ЕУ демонстранти.
„Ќе ја напуштам претседателската палата и ќе застанам со вас носејќи го со себе легитимитетот, знамето и вашата доверба“, рече таа.
Грузија беше опфатена со протести во текот на 2024 година, при што противниците на Грузискиот сон обвинуваат дека го насочува Тбилиси кон Москва, а не кон долгогодишната цел на кавкаската земја за пристапување во ЕУ.
Илјадници грузиски демонстранти и вчера формираа „човечки синџир“ во главниот град Тбилиси.
Новиот претседател е поранешен фудбалер на Манчестер Сити, и се смета за сојузник на владејачката партија Грузиски сон, јави Би-Би-Си.
Демонстрантите, веејќи грузиски и знамиња на ЕУ, формираа „човечки синџир“ кој се протегаше на километри.
