Приоритетите на заедничката европска одбрана, обезбедувањето на средства потребни за нејзино финансирање и зајакнувањето на постоечките партнерства на ЕУ, ќе бидат главни теми на отворената и слободна дискусија на денешниот неформален Самит на Унијата, најави претседателот на Европскиот совет, Антонио Кошта пред почетокот на средбата на шефовите на држави или влади на членките на блокот, што се одржува во бриселската палата Егмон.
– Ова е првпат да се сретнеме на состанок посветен исклучиво на одбраната и овој наш напор претставува продолжение на работата што ја започнавме на Самитот во Версај во март 2022 година, кога заклучивме дека Европската Унија треба да преземе поголема одговорност за својата одбрана, рече Кошта.
Тој изрази надеж дека лидерите ќе имаат стратешка дискусија со која ќе има дадат политички насоки на Европската комисија и на високата претставничка на ЕУ за надворешни работи и безбедносна политика Каја Калас за изработка на „Белата книга за одбраната“ и дека ќе го трасираат патот за одлуките што Унијата треба да ги донесе во наредните месеци.
Кошта потсети и дека на овој неформален Самит се поканети и британскиот премиер Кир Стармер и генералниот секретар на НАТО, Марк Руте, кои со европските лидери ќе разговараат за прашањата поврзани со заедничката европска одбрана.
Неформалните самити на ЕУ се собири на лидерите на земјите членки на кои само се дискутира и се разменуваат мислења за одредени прашања, но не се носат никакви одлуки.
