В недела на 9 февруари во Косово се одржуваат парламентарни избори. Право на глас имаат вкупно 2 милиони 75 илјади 868 гласачи.
Според податоците на косовската Централна изборна комисија (ЦИК), бројот на граѓани со право на глас на избирачките места во Косово е еден милион, 970 илјади и 944 гласачи, додека бројот на граѓани кои се пријавени за гласање надвор од Косово е 104 илјади и 924 гласачи. Но, колку македонски државјани со двојно државјанство имаат право да гласаат на изборите на 9 февруари во Косово?
Од ЦИК за Фронтлајн информираат дека немаат бројка на државјани на Севрна Македонија со двојно државјанство, бидејќи не ги идентификуваат гласачите на тој начин.
„Не, ние не ги идентификувавме на тој начин“, изјави за Фронтлајн Валмир Елези, портпарол на Централната изборна комисија на Косово.
Но, тој ги сподели со нас бројките на граѓани кои ќе гласаат во амбасадата на Косово и на оние кои ќе гласаат по пошта (гласачи регистрирани во странство).
„165 е вкупниот број, во кој се вклучени и гласачите регистрирани за гласање по пошта. Во меѓувреме, во Косовската дипломатска мисија во Скопје ќе гласаат 55 гласачи“, рече Елези.
Но, во Македонија многу е поголем бројот на граѓани кои на денот на изборите ја преминуваат границата со Косово и имаат право на глас поради двојното државјанство.
Според неофицијални податоци, брифирани од експоненти на политичките партии во земјава, бројот на потенцијални гласачи со државјанство од Северна Македонија кои гласаат во Косово може да биде уште поголем, бидејќи повеќето од оние кои имаат и косовско државјанство гласаат директно во Косово.
Гласачките центри во косовските дипломатски претставништва за изборите за Собрание на Косово, кои ќе се одржат на 9 февруари 2025 година, според Централната изборна комисија се во следните земји: Австралија, Австрија, Белгија, Чешка, Данска, Франција, Германија, Холандија, Унгарија, Италија, Канада, Хрватска, САД, Црна Гора, Северна Македонија…
Нано Ружин, универзитетски професор и поранешен амбасадор во НАТО, вели дека иако актуелниот премиер на Косово, Албин Курти е фаворит, трката ќе биде интересна.
– Во секоја демократска земја, изборите се еден вид отворен простор за политички промени, за победи или на опозицијата, или на партијата или на коалицијата, ако е на власт. Според моите сознанија, партијата на Курти е фаворит, но се претпоставува дека таа нема да има доволен број гласови во парламентот за да создаде еднопартиска влада. Се очекува дека оваа партија може да биде победник, но најверојатно ќе треба да влезе коалиција со друга политичка партија. Се претпоставува дека тоа е партијата на Рамуш Харадинај, така што во овој миг многу е тешко да се каже дека ќе дојде до смена на власта, но дека партијата на Курти има најголеми можности да добие најголем број седишта во парламентот, а понатаму евентуално да направи коалициона влада со некоја од помалите политички партии, изјави Ружин за Фронтлајн.
На изборите на 9 февруари на Косово се натпреваруваат вкупно 27 политички партии. Од нив, 19 се политички партии, пет коалиции, две граѓански иницијативи и еден независен кандидат.
Дестан Јонузи
