СДСМ со партиско соопштение реагира и ја демантира објавата од градоначалникот на Струмица, Костадин Костадинов од редовите на СДСМ, во врска со „родовата политика“.
Костадин Костадинов, претходно денеска во своја фејсбук објава истакна дека СДСМ ја препознава загриженоста на јавноста и ја менува својата позиција во однос на родовите политики.
„СДСМ го менува пристапот! СДСМ покажа слух за оправданиот револт на сите нас. Жената мора да биде ставена на прво место, родот тргнат! Останува сега на оние кои хараа и жигосуваа луѓе, држеа прес конференции за тоа колку биле против родови идеологии, а денес допрецизираат закони во кои брутално ја афирмираат родовата идеологија која цел свет ја оттргнува. Срамота, за ВМРО-ДПМНЕ“, напиша Костадинов.
Во реакцијата од СДСМ се истакнува дека Социјалдемократскиот сојуз на Македонија ја потврдува својата заложба за градење праведно и инклузивно општество, засновано врз темелните вредности на еднаквост, праведност и солидарност. Во партиското соопштение се нагласува дека социјалдемократските политики се фокусирани на елиминирање на општествените и економските нееднаквости.
„Социјалната правда и недискриминацијата се основни принципи на кои почиваат нашите политики. Само преку системски мерки може да се создаде општество во кое секој граѓанин има еднаков пристап до можности и ресурси“, стои во соопштението.
СДСМ истакнува дека останува доследен на борбата за родова еднаквост и човекови права, што е докажано низ повеќе реализирани мерки и иницијативи во изминатите години.
„Официјалните партиски ставови се утврдуваат преку дискусија и одлуки на соодветните тела и органи. Индивидуалните изјави и ставови надвор од овие рамки не се официјални ставови на партијата“, нагласуваат од СДСМ.
Партијата порачува дека ќе продолжи со политики насочени кон создавање поправедно и похумано општество, со акцент на заштита на основните човекови права и борба против сите облици на дискриминација.
Ј. Ѓ.
