На денешната прес-конференција, портпаролката на СДСМ, Богданка Кузеска, изнесе обвинувања за корупција, непотизам и конфликт на интереси во Министерството за дигитална трансформација, предводено од Стефан Андоновски.
Според СДСМ, фирмата „Матео Дизајн ДООЕЛ“ добила два тендери од ова министерство, и тоа во вредност од приближно 50.000 евра. Контроверзата, како што наведуваат од партијата, произлегува од фактот што управител на оваа компанија е Мартин Клинчаров, сопруг на Гордана Клинчарова, која е државен секретар во истото министерство.
Кузеска презентираше документи за два договори склучени помеѓу Министерството за дигитална трансформација и „Матео Дизајн“ – еден за набавка на конференциска и презентациска опрема во вредност од 2.400.000 денари (40.000 евра) и друг за набавка на ИТ опрема вреден 529.000 денари.
„Ова е еклатантен пример за конфликт на интерес и непотизам во редовите на ДПМНЕ. Очигледно, парите на граѓаните завршуваат во семејни фирми блиски до власта“, изјави Кузеска.
Од СДСМ тврдат дека истата компанија учествувала како изведувач во проектот „Скопје 2014“, конкретно во поставување на мермер и изградбата на мостот „Гоце Делчев“.
Партијата го поврза скандалот и со градоначалникот на Аеродром, Тимчо Муцунски, наведувајќи дека „Матео Дизајн“ во минатото се јавувала како донатор во оваа општина, а дека Клинчарова претходно била раководител на секторот за финансии токму во времето кога Муцунски бил градоначалник.
Барања за истрага
СДСМ повика Државната комисија за спречување на корупција да отвори предмет за овој случај, а надлежните институции да го истражат скандалот.
„Борбата против злоупотребата на парите на граѓаните продолжува, а целата шема на испумпување јавни средства преку фирми поврзани со ДПМНЕ ќе биде целосно разоткриена“, заклучи Кузеска.
Министерството за дигитална трансформација и министерот Стефан Андоновски сè уште немаат дадено официјален одговор на овие обвинувања.
