По 14 години незаборавни моменти на брегот на Дојранското Езеро, Музичкиот фестивал „Д Фестивал“ ја менува својата локација. Организаторите во објава на Фејсбук најавија дека јубилејното 15-то издание ова лето ќе се одржи во Штип, под Исарот, во периодот од 4 до 6 јули.
Со емотивна порака, тимот на Д Фестивал изрази голема благодарност до Дојран и дојранчани за долгогодишната поддршка, гостопримството и заеднички создадените спомени. Фестивалот, кој започна во 2011 година, прерасна во еден од најзначајните музички и културни настани во Македонија, привлекувајќи илјадници посетители од земјата и регионот.
„Полека и сигурно нашата Д заедница расте, и како дете што го напушта својот дом за да ги следи соништата, така и Д Фестивал тргнува по нов пат,“ стои во објавата. Организаторите најавуваат дека новата локација ќе понуди свеж простор за магија и ново платно за испишување на фестивалските приказни, со истиот дух и уште повеќе љубов.
Воедно, тимот на Д Фестивал упати посебна благодарност до луѓето и институциите кои низ годините помогнаа во развојот на фестивалскиот бренд во Дојран, споменувајќи ги поединечно оние кои беа дел од ова долго фестивалско патување.
Ј. Ѓ.
