Соединетите Американски Држави „веднаш ќе ја укинат суспензијата во размената на разузнавачки информации и ќе ја обноват безбедносната помош за Украина“, се вели во заедничката изјава на САД и Украина, објавена од американскиот Стејт департмент.
Украина е подготвена да ја прифати американската иницијатива за итен, привремен 30-дневен прекин на огнот по денешните мировни преговори во Џеда, Саудиска Арабија. Овој предлог за прекин на огнот ќе може да се продолжи со взаемна согласност на двете страни, но неговата примена зависи од прифаќањето и спроведувањето од страна на Русија, пренесува Би-Би-Си.
Американскиот државен секретар Марко Рубио изјави пред новинарите во Џеда, по разговорите со украинската делегација, дека САД дале понуда која Украина ја прифатила – да прифати прекин на огнот и да започне преговори за трајно и одржливо завршување на конфликтот. Тој додаде дека оваа понуда сега ќе ѝ биде пренесена на Русија и изрази надеж дека Москва ќе ја прифати. – Сега топката е кај нив, истакна Рубио, додавајќи дека претседателот Доналд Трамп сака крај на војната.
Советникот за национална безбедност Мајк Волц нагласи дека на состанокот се разговарало за деталите како да се постигне траен мир и какви безбедносни гаранции ќе бидат обезбедени за долгорочна стабилност. Тој најави дека во наредните денови ќе разговара со својот руски колега, а државниот секретар Рубио ќе учествува на средбата на министрите за надворешни работи на Г7, каде што ќе се продолжи со процесот.
На прашањето дали предложениот прекин на огнот се однесува на целата борбена линија или само на воздушните и поморските операции, како што предложи Украина, Рубио одговори кратко: „Да – понудата е целосен прекин на огнот“. Тој нагласи дека единствениот начин да заврши оваа војна е преку преговори, а за тоа да се случи, „прво мора да престане пукањето“.
Запрашан дали Украина прифаќа некакви гестови на добра волја од Русија или дали постои краен рок за спроведување на договорот, Рубио одговори: „Украина е подготвена да престане да пука и да почне да преговара“. Тој додаде дека се надева оти Русија ќе го прифати прекинот на огнот, но доколку тоа не се случи, „тогаш ќе знаеме што е вистинската пречка за мирот“. Повтори дека претседателот Трамп јасно ставил до знаење дека сака крај на насилството.
Кога новинарите прашаа зошто денеска не бил потпишан договорот за ретки минерали, Рубио објасни дека тоа не била тема на разговорите во Џеда. Тој појасни дека договорот се преговара меѓу украинските и американските финансиски институции, но дека претседателите на двете земји дале инструкции на своите владини претставници да го финализираат.
На прашањето дали односите меѓу Трамп и украинскиот претседател Володимир Зеленски се „вратени во нормала“, Рубио одговори дека најважно е „мирот да се врати на вистинскиот пат“. Тој потенцираше дека ова не е некакво ријалити шоу, туку „сериозна работа“ во која секој ден гинат луѓе. „
– Денеска луѓе ќе умрат во оваа војна, вчера загинаа, а доколку нема прекин на огнот, за жал, ќе умираат и утре, нагласи Рубио. Тој повтори дека Трамп сака ова да заврши, поради што и се одржуваат овие разговори.
Главниот советник на Зеленски, Андриј Јермак, кој беше дел од украинската делегација во Саудиска Арабија, сподели кратка изјава на социјалната мрежа Икс, нагласувајќи дека „заштитата на интересите на Киев е најважна“, а „праведен мир е клучен“. Тој им се заблагодари на американските и саудиските претставници за „конструктивниот состанок“.
Украинскиот претседател Володимир Зеленски му се заблагодари на американскиот претседател Доналд Трамп за „конструктивноста на разговорите меѓу нашите тимови“ кои се одвиваа денеска во Џеда, Саудиска Арабија.
Во видео-обраќање, Зеленски повтори дека украинската позиција е да го прифати денешниот американски предлог за прекин на огнот на небо, море и на фронтот.
– Го сметаме за позитивен чекор, изјави тој, додавајќи дека САД „мораат да ја убедат Русија“ да се согласи на договорот.
Како значаен дел од денешниот разговор, Зеленски го истакна американскиот договор за обновување на размената на разузнавачки информации со Украина.
– Украина е подготвена за мир, нагласи тој и додаде: Русија мора да покаже дали е подготвена да ја запре војната или да ја продолжи. Време е за целосна вистина. Им благодарам на сите кои ѝ помагаат на Украина“.
Шефот на кабинетот на украинскиот претседател, Андриј Јермак, кој учествуваше во разговорите, исто така се заблагодари на САД за „конструктивниот состанок“.
Во објава на социјалната мрежа Икс, Јермак нагласи дека „заштитата на интересите на Украина е најважна за нас“.
„Праведен мир е клучен за нас“, додаде тој, истакнувајќи дека Украина бара „траен мир“.
