Македонија завиена во црно, Кочани во мрак по страшната трагедија каде загинаа 59 лица, а 45 се во критичка состојба.
Љубомир Ѓурчевски, поранешен началник во МВР вели дека „во случајот затаила контрола, а ние точно знаеме кој е надлежен, Mинистeрството за внатрешни работи е надлежно да изврши контрола на присуството на малолетни лица во угостителски објекти, дали се точи алкохол на малолетни лица итн“.
– Перманентно таму станува збор за вршење на дејноста спротивно на законските прописи. Немало лиценца, немало одобрение, не исполнувал никакви услови. Дирекцијата за спасување и заштита кажа дека во делот на противпожарната заштита, немало никакви елаборати, дека немало поднесено никакво барање, во смисла на поставување на заштитна мрежа, појавувачи на пожар …. Сите институции констатираа еден куп слабости. Ако викаме тој работел спротивно на законите, како организирана држава, имате инспекциски служби на терен, имате полиција на терен, имате институции кои тоа требало да го спречат, да стават пломби и да запрат да ја врши дејноста која ја вршел. Тука имаме еден сплет на непочитување на закон, работење спротивно на закон, зашто веќе се поднесени соодветни пријави, изведени се соодветни докази, а се уште трае увидот. Така да мислам дека ова мора да се заврши со одговорност, затоа што не смееме да дозволиме неказнивоста да надвладее, затоа што целосно ќе ни го разгради системот, подвлече нашиот соговорник.
Пожарот во ноќниот клуб во Кочани избувна во неделата во раните утрински часови откако искри од пиротехнички средства, користени за ефект, го запалиле покривот, соопштија властите.
Околу 500 луѓе биле во ноќниот клуб кога избувнал пожарот додека бендот ДНК настапувал. Снимката од местото на настанот покажува дека покривот на клубот изгорел и се урнал на неколку места, оставајќи ги неговите внатрешни дрвени греди откриени и поцрнети. Од починати 59, досега се идентификувани 35 од кои 31 од Кочани и четворица од Штип. Над 155 лица се хоспитализирани – главно во клиниките во Скопје.
Тошковски истакна дека 45 се во критична состојба. Тој рече дека правното лице нема лиценца на работа и дека сопственикот на дискотеката при контрола приложувал фалсификувана лиценца. Министерот истакна дека се констатирани низа неправилности во дискотеката. Немала соодветна лиценца а работела како лесна индустрија. Немало излезни врати за евакуација, во објектот немало хидрантска мрежа и ималo само два ПП апарати. Тошковски вели дека концертот бил одржан на „диво“ – немало договор помеѓу бендот и организаторот.
Како што истакна Тошковски, над 22 – 23 лица се осомничени за целиот настан. Власта ветува брза и темелна истрага.
Министерот за здравство Арбен Таравари изјави дека 20 од повредените се во тешка состојба. Повеќе од 20 од повредените и тројца загинати се на возраст до 18 години, изјави министерот за внатрешни работи Панче Тошковски.
Некои пациенти се испратени на лекување во Бугарија, Србија, Турција и Грција, соопштија властите.
Главниот обвинител Љубчо Коцевски, рече дека е ангажиран тим од обвинители за расветлување на инцидентот.
Дестан Јонузи
