Од денеска до 16-ти овој месец ќе се одржува второто издание на Фестивалот за литература и општа култура „Видик“ во организација на „Литература.мк“. Оваа културна манифестација годинава ќе има и хуманитарен карактер, односно средствата од продадените билети за музичките и театарските настани ќе бидат наменети за семејствата на настраданите во несреќата во Кочани.
Организаторот најавува 15 настани во книжарницата „Литература.мк“ во „Дајмонд мол“ кои ги обединуваат литературата, музиката, театарот и уметноста. На програмата се промоции на книги, музички настапи, театарски изведби, изложби на фотографии и илустрации, проекции на документарци и мултимедијални презентации.
Фестивалот ќе почне денеска во 19 часот, со промоција на најновиот роман за возрасни „Три Марии“ од писателката Оливера Ќорвезироска, во издание на „Арс Ламина“. Промоторка на книгата ќе биде Илина Јакимовска, а извадоци ќе читаат актерките Катерина Коцевска, Биљана Драгиќевиќ-Пројковска и Симона Димковска.
Утре на програмата е театарската претстава „Лекција“ од Ежен Јонеско, а во петок ќе биде промовирана книгата „Панонскиот адмирал“ од Иван Ивачковиќ, посветена на Ѓорѓе Балашевиќ. Во сабота концерт ќе одржи младата македонска музичка ѕвезда Дина Јашари, а во недела ќе биде изведена театарската претстава за деца „Магичната флејта на Вулфи“.
Програмата продолжува на 8 април (вторник) со изложбата „Соѕвездие на детските сни“, а на 9 април (среда) ќе се одржи промоцијата на четвртиот роман на Моџо Килингтон – „СФ-СН“ во издание на „Арс Ламина“. Наредниот ден на програмата е концертот на „Симеон Ангеловски квартет“, а на 11 април ќе биде одиграна монодрамата „Сите најубави нешта“ во режија на Дејан Пројковски.
Под наслов „Патување низ звукот на корените“, на 12 април ќе се одржи концертот на Зарина Првасевда – македонската артистка и вокална изведувачка, додека во недела ќе биде одиграна театарската претстава за деца „Себастијан и sвездите“.
На Светскиот ден на уметноста, 15 април, ќе се одржи вечер посветена на уметникот Киро Урдин. На програмата се проекција на документарецот „Планетариум“ и изложба на фотографии и афоризми од Урдин.
Второто издание на „Видик“ ќе биде затворено на 16 април со промоција на сонетниот венец „Часови без часовник“ од Владимир Мартиновски, во издание на „Арс Ламина“. Ќе се одржи и музички настан „Џез, буки, веди“ на „Јани Костурски квартет“.
