Автомобилот „Застава 101“ е создаден врз основа на тогашниот технички многу модерен „Фиат 128“, со малку изменет заден дел и беше еден од првите автомобили произведени во хечбек-варијантата што преовладува денес.
Во тоа време, пет врати на едно возило беа реткост, а популарниот „Сто-кец“ беше привлечен за купувачите поради неговиот дизајн, но и поволната цена. Овој модел брзо стана најпродавано возило на „Застава“ во поранешна Југославија, а поради пристапната цена постигна значителен извозен успех, пред сѐ во источноевропските земји, но и во светот, пишува „Бизнискурир“.
Фејсбук-страницата „Застава 101 форум“ објави исечок од списание од 1972 година – практично од самиот почеток на продажбата на ова возило, во којшто се наведува дека тогашната цена била 40.040 динари или 2.084 долари.
Кога ќе се земе предвид менувањето на цените претходниве 50 години, пресметките говорат дека, денес, возилото „Застава 101“ би чинело точно 14.953 евра.
