Здружението на новинарите на Македонија (ЗНМ) изрази сериозна загриженост поради неодамнешните одлуки на Апелациониот суд Скопје, донесени во април 2025 година, со кои беа одбиени жалбите на новинарите нападнати за време на настаните во Собранието на 27 април 2017 година.
Според ЗНМ, овие одлуки испраќаат поракa дека нападите и заканите кон новинари може да останат несанкционирани, што, како што велат од здружението, го поткопува правото на безбедно и слободно новинарство.
Во соопштението од ЗНМ се наведува дека одлуките се донесени и покрај тоа што Уставниот суд претходно веќе утврдил дека ограничувањето на слободата на изразување во контекст на насилни настани е спротивно на Уставот и Европската конвенција за човекови права.
„Особено е проблематично образложението на судот дека заштитата на новинарите не треба да биде ‘преголем товар’ за институциите“, наведуваат од ЗНМ, оценувајќи дека ваквиот став ја минимизира обврската на државата да обезбеди заштита на медиумските работници.
Последните пресуди се однесуваат на случаите на новинарите Наташа Стојановска, Билјана Николовска, Игор Јанковски и Томе Ангеловски, кои беа жртви на насилство за време на упадот во Собранието во 2017 година. Според ЗНМ, овие одлуки покажуваат дека правната заштита на новинарите останува слаба, а неказнивоста на насилниците придонесува за чувство на страв и несигурност меѓу медиумските работници.
ЗНМ апелира до надлежните институции да ги преиспитаат овие одлуки и да обезбедат соодветна правна заштита за новинарите. „Нападот врз новинар е напад врз демократијата – и секој таков чин мора да биде истражен и санкциониран“, се наведува во реакцијата на здружението.
ЗНМ најави дека ќе продолжи активно да го следи развојот на овие случаи и да се залага за правда за сите новинари жртви на насилство.
