Украинскиот претседател Володимир Зеленски синоќа во своето традиционално вечерно обраќање, изјави дека првиот чекор кон мир во Украина е Русија да се согласи на безусловно примирје.
-Тие мора да преземат јасни чекори кон завршување на војната, а ние инсистираме првиот чекор да биде безусловно и целосно прекин на огнот. Русија мора да го стори тоа, нагласи Зеленски.
Украинскиот лидер, исто така, рече дека Украина се подготвува за повеќе разговори со САД, кои имаат за цел да извршат притисок врз Москва да учествува во разговорите.
-Ги избираме точките на притисок во Русија кои најсилно ќе ја охрабрат Москва кон дипломатија, истакна украинскиот претседател.
Володимир Зеленски вчера го критикуваше предлогот на рускиот претседател Владимир Путин за тридневен прекин на огнот од 8 до 10 мај, по повод прославата на победата на Советскиот Сојуз над нацистичка Германија во Втората светска војна. Украинскиот претседател изјави дека нема потреба да се чека до 8 мај за прекин на огнот.
Портпаролот на Кремљ, Дмитриј Песков, претходно вчера изјави дека Украина не одговорила на понудата на Путин за директни мировни преговори и дека не е јасно дали Кијив ќе се приклучи на иницијативата за тридневен прекин на огнот.
