Во СДСМ постои демократски капацитет за отворени внатрепартиски дебати, особено за клучни прашања како родовата еднаквост, човековите права и заштитата на малцинствата, вели потпретседателката на СДСМ, Кристина Костова, во интервју за Фронтлајн, како одговор на прашањето – Има ли внатрепартиски дебати во СДСМ за теми како родовата еднаквост, ова особено ако се земат идеолошките разидувања по ова прашање на некои истакнати политички фигури од редовите на СДСМ?.
„Во секоја демократска партија е потребно и посакувано често да се водат дебати, особено за така важни прашања како што е тоа родовата еднаквост и права на различни видови малцинства“, нагласува Костова. Таа смета дека вистинската социјалдемократска политика подразбира отвореност за различни ставови, но и цврста заложба за заштита на обесправените.
„Правата на сите, особено на маргинализираните, не смеат да бидат жртвувани на олтарот на строгите норми кои ги одржуваат застарените динамики за одржување статус кво и доминација на најмоќните“, вели таа. За Костова, оваа борба е глобален предизвик: да се спротивставиме на модерните форми на дехуманизација и пропаганда кои ги угнетуваат најнепривилегираните.
Во однос на меѓуетничките и меѓуверските односи, како и човековите права и еднаквоста, Костова потврдува дека овие теми се дел од континуираните внатрешни процеси на евалуација и надградба во СДСМ.
„Ваквите дебати го издигнуваат партискиот дух и сила, но и го зацврстуваат општественото ткиво“, смета таа. Според Костова, токму преку внатрепартиските расправи и залагања, СДСМ успеала да внесе системски промени и да придонесе за унапредување на правичноста и рамноправноста во македонското општество.
Но таа и предупредува: „Нема гаранција дека вечно ќе трае еднаш освоената слобода, дека еднаш добиените права вечно ќе ги уживаме“. Демократијата, според неа, е кревка и бара постојана грижа, посветеност, едукација и активна борба – и внатре во партијата, и на пошироко општествено ниво.
Поврзано:
Интервју со Кристина Костова: Мицкоски сака да владее во хаос, СДСМ се враќа со конкретни решенија
