Премиерот Христијан Мицкоски денеска оцени дека договорот за стратешко партнерство со Обединетото кралство ќе овозможи најсилна досега економска соработка меѓу двете влади и претставува втор столб на нашата меѓународна позиционираност по стратешкото партнерство со САД, истакнувајќи дека е потврда оти нашата држава чекори по патот на стабилноста, безбедноста, развојот и европската иднина.
-Договорот за стратешко партнерство со Обединетото кралство ќе биде основата и фундаментот на инвестициски циклус кој ќе има вкупна рамка од пет милијарди фунти односно шест милијарди евра. Дел од парите ќе бидат за инвестиции во инфаструктурата, изградба на модерна карго и брза патничка железница од Табановце до Гевгелија, инвестици во здравстото и нови болници, завршување на проектот на Клиничката болница во Штип, заедно со зградата на новиот Медицински факултет, студентски дом со капацитет од 900 легла, изградба на болницата во Кичево, заедно со здравствен дом, реконструкција на Клинилката болница во Тетово. Во наредниоте денови ќе се потпишат договори и за овие инвестици, рече Мицкоски на заедничка прес-конференција со британскиот амбасадор Метју Лосон во Владата.
Двете држави, нагласи Мицкоски ги поврзуваат заеднички вредности кон кои се стремиме и за кои се бориме да ги воспоставиме како слобода, демократија, владеење на правото, но ова партнерство значи многу повеќе од билатерален аранжман, тоа е, вели, архитектура за иднината.
Покрај економската соработка, вклучително и во капитални инвестиции, во инфраструктурата и здравството и енергетиката, партнерството што го формализираме, додаде тој, ќе придонесе за модернизација на нашите вооружени сили и подлабока интеграција во НАТО стандардите, за зголемување на безбедноста на границите и да се спротивставиме на трговијата со луѓе и шверцот. Ќе ја засили, како што рече Мицкоски и соработката во областа на образованието, дигиталната трансформација и иновациите, а ќе ги поврзе и нашите млади, креативни генерации преку културата, науката и новите технологии.
-Обединетото Кралство беше со нас уште во најраните и најтешките денови на нашата независност. Беше меѓу првите држави што нè препознаа, ни подадоа рака и инвестираа во нашата стабилност и институционален развој. Градејќи ја нашата демократија, ја имавме нивната целосна поддршка. И овие денови, ова силно партнерство е логично продолжение на тоа заедништво, засновано на доверба, почит и заедничка визија, рече Мицкоски оценувајќи дека со оваа декларација се отвора новото поглавје во односите помеѓу двете држави.
Лосон оцени дека договорот е врвен момент во билатералната врска меѓу двете земји, изградена на заеднички вредности, заедничко членство во НАТО и мошне богата трговска врска. – Ние сме големи инвеститори и британската Влада реши да го надградува тоа преку договор меѓу двете влади кој се фокусира на трговија и инвестиции за да се креира поголем раст и стотици милиони фунти од кои граѓаните на оваа земја ќе имаат корист заедно со граѓаните на нашата земја, рече Лосон.
Ова не е партнерство само на хартија туку партнерство на споделени вредности и посветеност, посочи британскиот амбасадор. – Како дел од тоа преку билатераното партнерство, ќе ја продлабочиме и понатаму нашата врска преку одбранбената соработка, образование, справување со организираниот криминал како и криумчарење на мигранти во овој регион, во Обединетото кралство и во други земји, порача Лосон кој најави дека договорот за статешко партнерство ќе биде потпишан наредната недела во Лондон.
Во однос на условите за најавените инвестиции од договорот, според премиерот Мицкоски се работи на деталите кои се, вели, најдобрите што некој може да ги има на пазарот.
– Ги знам отприлика бидејќи веќе се преговара со месеци и можам да кажам дека се најдобрите што може да ги има на пазарот, но тоа се уште не е финиширано, не е конечно иако сме блоску до конечно решение. Многу скоро од денеска и тоа ќе биде објавено, репер ние Еурориборт, и два фиксни параметри, грејс период и долг период на отплата, рече Мицкоски на новинарско прашање.
Мицкоски и британскиот премиер Кир Стармер вчера на средба во Тирана одржана во рамки на Самитот на Европската политичка заедница, оценија дека договорот за стратешко партнерство ќе значи уште посилна соработка, поцврсти односи и можност за продлабочување на односите.
Договорот е резултат на повеќемесечни интензивни преговори меѓу дипломатски и експертски тимови од двете страни. Се оценува како историски и се очекува да отвори нови перспективи за соработка во клучни области како безбедноста, економијата, инвестициите, образованието, дигиталната трансформација и климатските промени.
Со потпишувањето на договорот, Македонија треба да добие пристап до британска експертиза, финансиска поддршка за реформи и можности за британски инвестиции во стратешки сектори како енергетиката, инфраструктурата и иновациите. Дополнително, соработката ќе опфати и засилен политички дијалог, како и координација во рамки на меѓународните институции и глобалните безбедносни предизвици.
