Градоначалникот на Струмица, Костадин Костадинов, денеска информираше дека во Владата биле потпишани договори за неколку стратешки важни проекти за општината, со вкупна вредност од речиси 6,5 милиони евра. Тој им се заблагодари на Владата и премиерот за поддршката на стратешките проекти во Струмица.
„Денеска во Владата ги потпишавме договорите за стратешки важни проекти за нашата Струмица, со вкупна вредност од речиси 6.5 милиони евра,“ објави Костадинов на социјалните мрежи.
Меѓу проектите кои ќе се реализираат се:
уредување на каналот „Крушевска Република“,
инвестиции во станбени и сервисни улици,
целосна инфраструктура околу новиот градски пазар, за кој се најавува дека ќе биде најголем во Македонија.
„Ова не се само проекти – ова се конкретни чекори за ново урбано лице на нашиот град. За повисок квалитет на живот, за поубава, поподготвена, похумана и поевропска Струмица,“ нагласи градоначалникот на Струмица кој го замрзна своето членство во СДСМ, откако партијата објави дека нема да го кандидира за следен мандат.
Костадинов изрази благодарност до тимот на Општината, но и до Владата и премиерот за поддршката и соработката.
„Од срце му благодарам на мојот тим за посветената работа, но и на Владата и Премиерот, кои ја препознаа нашата визија и го валоризираа трудот што го вложивме,“ порача тој.
