Повеќе од кога било на светот му е потребно поблиско партнерство помеѓу ЕУ и Јапонија, изградено врз заеднички вредности и интереси, порача денеска во Токио претседателот на Европскиот совет, Антонио Кошта во обраќањето на почетокот на Самитот ЕУ-Јапонија.
– Јапонија е нашиот најблизок партнер во Индо-Пацификот. Партнерството ЕУ-Јапонија претставува стабилен модел на соработка што промовира мир, демократија и меѓународен поредок базиран на правила и мултилатерализам, рече Кошта.
Тој нагласи дека клучен столб на европско-јапонските односи е партнерството во сферата на безбедноста и одбраната.
– Ова партнерство е уште позначајно во еден се понестабилен и непредвидлив свет. Работиме заедно за да го зголемиме нашиот просперитет преку трговија и иновации и да ја зајакнеме економската безбедност и отпорноста на синџирот на снабдување, додаде Кошта.
Според него, благодарение на Договорот за економско партнерство меѓу ЕУ и Јапонија меѓусебните трговски текови се зголемиле за 20 проценти, со што оваа спогодба се покажала како голем успех.
– Сега, нашата нова Алијанса за конкурентност ќе ги зајакне нашите економски врски уште повеќе, заклучи Кошта во обраќањето.
Претседателката на Европската комисија, Урсула фон дер Лајен во своето обраќање на почетокот на Самитот истакна дека суштината на партнерство меѓу ЕУ и Јапонија е во смиреноста, отпорноста и длабоката вкоренетост, што има особена вредност во денешниот турбулентен свет.
– Европа и Јапонија се блиски и доверливи пријатели. Ги споделуваме вредностите праведност, отвореност и почитување на правилата. И заедно, ние сме способни не само да ги браниме нашите интереси, туку и да ги обликуваме глобалните случувања, порача Фон дер Лајен.
Потсетувајќи дека ЕУ и Јапонија заедно креираат една петтина од глобалниот БДП, Фон дер Лајен нагласи дека нивното значење е уште поголемо благодарение на Договорот за економско партнерство, кој, како што рече, е солиден и дава резултати.
– Овој самит е наша шанса да ги преземеме следните чекори. Да ја зајакнеме нашата заедничка конкурентност, да ја подобриме нашата заедничка безбедност и да поставиме глобални стандарди усогласени со нашите вредности, додаде Фон дер Лајен.
Покрај Кошта и Фон дер Лајен, во составот на европската делегација што учествува на Самитот е и високата претставничка на ЕУ за надворешни работи и безбедносна политика Каја Калас.
