Собранието на Република Северна Македонија за утре закажа итна седница со единствена точка на дневен ред – Предлог-закон за изменување и дополнување на Изборниот законик, по скратена постапка. Седницата ќе се одржи и покрај тоа што локалните избори веќе се распишани.
Меѓу клучните новини во предложените измени е воведувањето на два нови члена – 60-а и 60-б – со кои детално се уредува начинот на поднесување на листи од страна на независните кандидати.
Се предлага минимален праг за т.н. независни кандидатури за градоначалници и советнички листи да изнесува 0,95 од запишаните избирачи во Избирачкиот список за општината, односно Градот Скопје. Истиот праг би важел и за избор на пратеници.
Во членовите 60 а и б се предлага:
„(1) Кога подносител на листа на кандидати за пратеници е група избирачи, потребно е да се соберат најмалку 0,95% потписи од запишаните избирачи во изводот на Избирачкиот список на изборната единица.
(2) Кога подносител на листа на кандидати за пратеници е група избирачи од изборните единици за гласање во странство, потребно е да се соберат најмалку 1.000 потписи од запишаните избирачи во изводот од Избирачкиот список за тие изборни единици пред службените лица на ДКП, односно конзуларните канцеларии на образец пропишан од Државната изборна комисија.“Кога подносител на листа на кандидати за членови на Совет, односно листа на кандидат за градоначалник е група избирачи, е потребно да се соберат
најмалку 0,95% потписи од запишаните избирачи во Избирачкиот список за општината, односно Градот Скопје.
Предлог-законот е ставен на дневен ред по скратена постапка, што предизвикува реакции во јавноста бидејќи измените се разгледуваат во период кога изборниот процес веќе е во тек, а изборниот праг на независните кандидати е само 0,05 отсто помалку од прагот што Уставниот суд го прогласи за неуставен.
Претходно ДИК на седница во саботата усвои заклучок вон сила да се стави Упатството на ДИК од 2024 за регулирање на постапката за собирање потписи и начинот на определување на нотарите согласно Изборниот законик. Како што рече претседателот на ДИК Борис Кондарко, тоа упатство за регулирање на постапката за собирање потписи се става вон сила поради одлуката на Уставниот суд со која се укинати членови 61 и 62 од Изборниот законик каде што е предвиден број/процент на потписи за предлагање листи на група избирачи.
Ј. Ѓ.
