Ослободителната пресуда за Мишел Платини и Сеп Блатер, на кои им беше повторно судено во март во Швајцарија во случајот за измама, денеска стана конечна, откако обвинителството не поднесе жалба.
„Јавниот обвинител на Конфедерацијата се откажува од поднесување на жалбата“ и со тоа ја прифаќа „пресудата донесена во прв и втор степен“, објави денес швајцарското Обвинителство.
Со ова, по десет години процес со силни политички последици, е ставен крај на случајот во кој обвинителството на два пати неуспешно бараше условни затворски казни за обвинетите.
„Знам дека оваа афера беше дизајнирана да ме спречи да станам претседател на ФИФА“, рече Платини по одлуката на апелацискиот суд, додавајќи дека сега е „премногу стар“ за да размислува за нови позиции.
Платини и Блатер беа обвинети дека „нелегално, на штета на ФИФА, примиле исплата од два милиони швајцарски франци (околу 1,8 милиони евра) во корист на поранешниот трикратен освојувач на Златната топка.
И одбраната и обвинителството се согласија за едно: Платини го советуваше Блатер помеѓу 1998 и 2002 година, за време на неговиот прв мандат на чело на ФИФА, а во 1999 година потпишаа договор за годишен надомест во износ од 300.000 франци, кој ФИФА го исплати во целост.
Сепак, во јануари 2011 година, Платини побарувал дополнителни два милиони франци, што обвинителството ја опиша како „фиктивна сметка“.
И двајцата тврдеа дека се договориле за годишна плата од еден милион франци усно од самиот почеток, без сведоци, но дека ФИФА потоа не можела веднаш да ја исплати целата сума.
Обелоденувањето на аферата во средината на 2015 година, кратко откако Блатер поднесе оставка поради низа скандали, го спречи Платини да застане на чело на ФИФА и со тоа го отвори патот за Џани Инфантино, тогашниот негов најблизок соработник во УЕФА.
