Градоначалникот на Општина Центар, Горан Герасимовски денеска официјално го откри новиот мурал на улица „Орце Николов“ во Дебар Маало, посветен на култната детска серија „Бушава азбука“.
Со овој чин свечено се одбележаа 40 години од нејзиното прво емитување.
Делото на уметниците Драган Китановски Драш и Мирослав Грчев Микс, целосно финансирано од Општина Центар е создадено во духот на афирмација на македонскиот јазик и литература и претставува нова сцена на отворено за жителите на Центар.
Муралот, како што наведуваат од општина Центар, буди носталгија кај повозрасните, креативност и фантазијата кај младите и внесува свежа енергија во градскиот простор.
-И јас сум дел од генерацијата која порасна учејќи од „бушавите букви“, а овој мурал е потсетник токму на тие убави и среќни времиња. Времиња во кои се негуваше автентичната македонска продукција, кога имавме што да гледаме и со што да се пофалиме. Токму затоа Општина Центар континуирано вложува во македонски автори и уметници, градејќи сопствен културен бренд, изјави Герасимовски.
Настанот беше збогатен со премиера на „Буквождер“, креативни работилници за деца, музички сет на диџеј Vishko и презентација на првите лиценцирани производи „Бушава азбука“. Организацијата ја реализираше раскажувачкото студио „Види вака“. ац/вј/
Фото: Општина Центар
