Најавата дека Орце Ѓорѓиевски ќе го донесе фестивалот EXIT во Скопје предизвика бројни реакции и прашања во јавноста. Четири години откако претходната власт го организираше EXIT во Струмица, Ѓорѓиевски повторно ја актуализира темата, но овој пат во политички многу поосетлив контекст.
Имено, EXIT по повеќе од 20 години се сели од Србија поради, како што велат организаторите, политички притисоци и укинување на државната поддршка. Фестивалот јавно застана на страната на студентските протести против власта во Белград, што резултираше со прекин на сите форми на институционална помош.
„Ова е најтешката одлука во нашата 25-годишна историја, но веруваме дека слободата нема цена. Со овој чин не го браниме само EXIT, туку и основното право на слободен израз,“ изјави основачот и директор на фестивалот, Душан Ковачевиќ.
Тој предупреди и дека „владеењето преку страв не е патот по кој треба да оди Србија, особено со оглед на нејзината политичка историја“.
Во Македонија, пак, ВМРО-ДПМНЕ со години се смета за најблизок партнер на Вучиќ и неговата политика. Оттаму, дилемата што ја отвора овој случај е очигледна: дали Орце Ѓорѓиевски се дистанцира од Вучиќ или се работи за уште една форма на политички маркетинг?
