Осврнувајќи се на ветувањата дека Вардариште може да стане парк, кандидатката на СДСМ за градоначалник на Скопје, Каја Шукова во интервју за Рацин.мк посочи дека тоа е тешка манипулација со граѓаните на Скопје.
Таа вели дека станува збор за огромна површина која со децении е контанимирана со различен вид на отпад кој испушта и штетни гасови.
„Имате локација која до 1996-1997 година беше градска депонија до изградба на депонијата Дрисла. Тоа значи дека на таа локација вие имате огромни количини на ѓубре, проценките се некаде околу два милиони метри кубни различно ѓубре. Проценките се дека тоа оди од 10 до 12 метри во длабочина. Секако има поврзаност со подземните води, Скопје знаеме дека лежи на води. Значи, таму имате сериозни процеси, производство на гасови, односно метан, кој можат во секој време и да експлодираат. Значи, комплексен процес. Имате контаминирана локација, а која било контаминирана локација вие не можете да исчистите за една година, за две години, за пет години. Тие се долги процеси. Имате контаминација на почвата, имате контаминација на подземните води. Илузорно е да кажете дека за една година таму ке го израмните земјиштето, ќе засадите трева, ќе направите патеки, ќе направите парк“ порача таа.
Шукова додава и дека е потребно време целата локација да се ревитализира, да се најде друга локација за претоварна станица, дури потоа да се размислува што да се прави на постојната локација.
