Денови наназад контејнерите низ главниот град не се празнат. Најфреквентните улици, но и населбите, се преполни со смет кој стои недопрен и се разлева околу контејнерите. Градот мириса на стоен отпад, а граѓаните се соочуваат со неподносливи услови за живот.
Што се подразбира под „неподносливи услови за живот“?
Доколку немате каде да го сместите сметот, од органски до неоргански, мора да се складира, односно да не се изнесува надвор од домовите, во малите канти за смет кое ги има во секое домаќинство најмалку по три. Кога сметот се собира внатре во домовите, се предизвикуваат сериозни здравствени и еколошки ризици.
Неподносливото трупање на отпадот во Скопје не е само естетски проблем. Стоената храна и сметот создаваат средина за бактерии и микроорганизми кои можат да предизвикаат стомачни инфекции, дијареа и други болести. Преполните контејнери привлекуваат инсекти и глодари што дополнително носат ризик од заразни болести, додека токсичните гасови од распаѓањето на отпадот ја загадуваат околината и влијаат на дишењето и здравјето на граѓаните. Десетдневното запоставување на собирањето на ѓубрето го претвора градот во сериозна здравствена закана.
Состојбата е очигледна – сметот не се собира ниту од големите контејнери во центарот, ниту од улиците во населбите. Наместо редовно чистење и хигиена, секој агол на Скопје е веќе претворен во потенцијална депонија.
Ваквата негрижа ја деградира секоја основна услуга што граѓаните ја плаќаат, а институциите очигледно не ја обезбедуваат. Веќе десетдневниот застој во собирањето на отпадот покажува колку системот е нефункционален и колку малку внимание се посветува на еден од најважните сегменти за здравјето и нормалното секојдневие. Додека надлежните молчат, граѓаните остануваат затрупани во сопствениот отпад.
Додека политичарите во своите говори често го нарекуваат Скопје „метропола“, сликите на преполни контејнери и смет расфрлан по улиците го покажуваат токму спротивното.
Град кој тоне во сопственото ѓубре не може да се претставува како модерен урбан центар, особено кога основните услови за чиста и здрава животна средина се целосно занемарени.
Скопје не смее да биде оставено да се дави во сопствениот отпад. Десетдневното запоставување на собирањето на ѓубрето јасно покажува дека градот и неговите жители се занемарени, а последиците за здравјето и животната средина стануваат се поочигледни, институциите мора да преземат одговорност, додека граѓаните секојдневно плаќаат за нивната негрижа.
ЦИВИЛ ги потсетува и повикува граѓаните дека во секое време можат да испраќаат информации и видео/фото материјали за сите локални проблеми во нашата редакција.
Дијана Тахири / Цивил Медиа
