Германските оператори на електричната мрежа објавија дека се подготвени следната година да ги преполоват надоместоците за пренос на електрична енергија со поддршка на државни субвенции.
Планираното намалување на надоместокот за 57 проценти ќе им обезбеди олеснување на граѓаните и индустриските потрошувачи, бидејќи тие во моментов плаќаат за електрична енергија по цени кои се меѓу највисоките во Европа.
Таксите се очекува да се намалат од 6,65 центи на 2,86 центи по киловат-час, што ќе овозможи владини субвенции од фондот за клима од 6,5 милијарди евра, соопштија мрежните оператори 50Hertz, Amprion, TenneT и TransnetBW во денешната заедничка изјава.
Операторите, исто така, потсетуваат дека намалувањето на надоместокот сè уште треба да биде одобрено од германскиот Парламент како дел од новиот закон што треба да се донесе до 5 декември.
Електричната енергија е скапа во Германија поради надоместоците за пренос, таксите и даноците, што претставува дополнителен товар за големите индустриски потрошувачи и економијата како целина.
Во просек, граѓаните моментално плаќаат електрична енергија по цена од приближно 40 центи за киловат час, што е за 20 проценти повисоко отколку во периодот пред енергетската криза, наведува здружението на енергетската индустрија BDEW.
Заедно со планираното намалување на надоместоците за пренос, коалициската влада на канцеларот Мерц планира да го намали данокот на електрична енергија на европскиот минимум, меѓу другото, за индустрискиот и земјоделскиот сектор, забележува ДПА.
