Научниците открија нови видови органски соединенија во мразот што излегува од гејзерите на месечината Енцеладус, еден од најмистериозните светови на Сатурн, зголемувајќи ја веројатноста дека овој океански свет може да има услови погодни за живот.
Овие резултати, објавени во списанието Nature Astronomy, се базираат на податоци од летот на вселенското летало Cassini во 2008 година, кое минало низ облаците вода и мраз што излегуваат од пукнатините кај јужниот пол на Енцеладус.
„Да се биде погоден за живот и да се биде населен се две сосема различни работи. Веруваме дека Енцеладус е погоден за живот, но не знаеме дали навистина има живот таму,“ изјави Фабиан Кленер од Универзитетот во Вашингтон, еден од авторите на студијата.
Анализата на помлади ледени честички – кои со огромна брзина од 64.800 км/ч се судриле со инструментите на Cassini – откри свежи органски молекули директно поврзани со подземниот океан на Енцеладус. Ова ги потврдува претходните наоди и додава нови докази дека хемиските услови под ледената кора можат да бидат слични на оние кај хидротермалните отвори во Земјините океани.
„Сигурни сме дека овие молекули потекнуваат од подземниот океан на Енцеладус, што дополнително го зголемува неговиот потенцијал за хабитабилност,“ рече Ноцаир Каваџа од Слободниот универзитет во Берлин, водечки автор на истражувањето.
Иако Cassini ја заврши својата мисија во 2017 година, научниците сè повеќе повикуваат на нови мисии кон Енцеладус. Европската вселенска агенција веќе разгледува план за слетување на месечината, додека Кина предложи своја мисија. Во меѓувреме, НАСА ја подготвува мисијата Europa Clipper кон месечината Европа на Јупитер, која ќе почне со своите прелети во 2030 година.
„Подземните океани на вакви месечини се можеби најдобрите кандидати за појава на вонземски живот во нашиот Сончев систем. Овие резултати само го потврдуваат тоа,“ вели физичарот Најџел Мејсон од Универзитетот во Кент, кој не бил дел од студијата.
Редакција Фронтлајн
Прочитајте и…
Живот на други светови: Каде најмногу се надеваат научниците?
