Независниот кандидат за градоначалник на Скопје, поддржан од Независни заедно, професор Горан Марковски, остро реагира на фактот дека и по две недели од кампањата за локалните избори 2025 сè уште нема најава за телевизиски дебати меѓу кандидатите.
„Изминува и втората недела од кампањата за Локалните избори 2025, а сѐ уште нема најава за ниту една дебата помеѓу кандидатите за градоначалник на Скопје. Чиниш се работи за избор на претседател на куќен совет во некоја приградска населба,“ вели Марковски.
Тој додава дека оправдувањата за оваа состојба се различни, „од (пре)голем број пријавени кандидати, наводна (пре)зафатеност на некои од фаворизираните, па се до целосна ,‚незаинтересираност’ на одредени медиуми кои, патем речено, за тоа се обврзани, а и платени“.
„Молчешкум да се влезе во предизборниот молк е неприфатливо“
Марковски оценува дека изостанувањето на дебатите ја поткопува демократијата и ја лишува јавноста од суштинска можност да ги процени кандидатите.
„Убеден сум дека за едно демократско општество, за какво се прокламираме, е неприфатливо молчешкум да се влезе во предизборниот молк. Дебатите на националните фреквенции, за нас независните кандидати претставуваат шанса за рамноправно одмерување на интелектуалните сили, идеите и визиите со останатите кандидати,“ порача Марковски.
Тој посочи дека со укинување на дебатата, „најдемократската алатка во секој изборен процес“, губат сите:
„Губи демократијата, губат медиумите, губат граѓаните, губи општеството. Губи градот, губи државата. Губат сите. Поточно, скоро сите!“
Критика кон медиумското претставување
Во својата изјава Марковски ја нагласува нерамноправната положба на независните кандидати во медиумската кампања:
„Сосема ми е јасно дека е многу полесно и покомотно да се испраќаат ,‚епски’ пораки читани од т.н. идиот, да се одговара на однапред доставени прашања, да се ветуваат брда и долини опкружени со истомисленици… Од оние исти билборди до кои независниот нема ниту законска можност да пристапи, дури и да реши сам да ги плати безобразно скапите тарифи.“
„Скопје има шанса“
И покрај, како што вели, „нефер изборните услови“, Марковски тврди дека тоа го мотивира уште повеќе:
„Ваквите нефер изборни услови за мене се истовремено извор на нова творечка енергија, мотив за зголемена креативност, причина за појака верба во исправноста на започнатата мисија. И што е најважно од сѐ, убеден сум дека тие се поттик за ваша поголема поддршка.“
Тој ја завршува својата порака со силниот слоган: „Предавање нема! Скопје има шанса.“
Ј. Ѓ.
