Родителите и блиските на 62-та загинати во пожарот во „Пулс“ во Кочани, што се случи на 16 март годинава, од утре ќе започнат со мирни јавни собири и блокади на кружниот тек кај двојниот мост на улицата „Стево Теодосиевски“.
Одлуката ја најавија на денешниот 26. „Марш за ангелите“, посветен на жртвите од трагедијата. Причината, како што рекоа, се изјавите на адвокати на обвинетите дека судскиот процес може да трае и од 10 до 15 години.
„Оваа изјава е срамна и понижувачка за семејствата чии деца ги загубија животите. Звучи како обид да се подготви јавноста за одолговлекување и заборавање. Ние тоа нема да го дозволиме“, изјави мајка на едно од загинатите девојчиња пред новинарите, пренесе МИА.
Јавните собири и блокадите ќе траат по еден час секој ден, од 15:15 до 16:15 часот, и ќе продолжат сè додека не започне судскиот процес за трагедијата во „Пулс“.
Родителите побараа зголемување на капацитетот на судскиот состав со дополнителни судии и судски соработници за да не се одолговлекува постапката. Тие инсистираат рочиштата да добијат приоритет и континуитет, без непотребни одложувања и технички изговори.
„Правдата не смее да се влече. Ќе бидеме тука на кружниот тек секој ден, сè додека не почне судењето. Животот на едно дете вреди повеќе од нечии интереси и адвокатски игри“, порачаа членовите на семејствата кои ги загубија своите најблиски.
Денешниот „Марш за ангелите“ започна и заврши во Паркот на Револуцијата, со кратка блокада на кружниот тек пред двојниот мост – токму на местото каде што од утре ќе се одржуваат протестите.
Реакција од Обвинителството и Адвокатската комора
По реакциите на родителите, државниот јавен обвинител Љупчо Коцевски упати отворено писмо до Адвокатската комора, предупредувајќи дека дел од адвокатите на обвинетите изнесуваат коментари за предметот без да се запознаени со обвинението, доказниот материјал или планот на Судот.
Во писмото, Коцевски посочува дека некои адвокати настапуваат како „непристрасни експерти“, без да појаснат дека всушност се бранители на обвинетите и ги застапуваат нивните интереси.
Од Адвокатската комора денеска соопштија дека дописот од државниот обвинител сè уште не пристигнал. Откако ќе го добијат и разгледаат, ќе излезат со официјален став и реакција.
