Десетото коло од Ла Лига ја носи големата пресметка во шпанскиот фудбал популарниот „Ел Класико“. Реал Мадрид ја пречекува Барселона на „Сантијаго Бернабе“. Ова се очекува да биде повеќе од натпревар, како што било и досега. Денешниот дуел на големите ривали е вкупно 262.натпревар во сите конкуренции или 191.дуел во првенство.
Реал Мадрид по ерата на Карло Анчелоти сега на клупата е предводен од Чаби Алонсо, за кого ќе биде прв дерби дуел против Барселона како тренер. Тој за денешниот дуел нема да може да смета на повредените Давид Алаба и Антонио Рудигер.
На спротивната клупа е Ханси Флик, кој пак ќе има проблеми со најдобриот состав бидејќи неколку играчи се на списокот на повредени: Марк Андре Тер Штеген, Рафиња, Дани Олмо, Роберт Левандовски, Гави, Гарсија.
На досегашните 261 натпревар Реал Мадрид има 105 победи, а Барселона 104 со 52 нерешени натпревари. Двата тима имаат одиграно 190 првенствени натпревари со скор 79:76 за „кралскиот клуб“ и 35 нерешени. Последните четири меѓусебни дуели во сите натпреварувања завршија со победа на Барселона.
Најмногу натпревари на „Ел Класико“ има одиграно играчот на Барселона Серхио Бускетс – 48 (29 првенствени), а следуваат Серхио Рамос и Лионел Меси со по 45. Инаку, Меси со 26 голови во сите натпреварувања е најдобар стрелец.
Денешниот натпревар е воедно дуел на првиот на табелата Реал Мадрид против втората Барселона. „Кралскиот клуб“ е лидер со 24 бодови, додека „каталонците“ имаат 22.
Првиот натпревар Реал Мадрид и Барселона го имаат одиграно на 13.мај 1902 година, а последниот беше на 11.мај 2025 и заврши со победа од 4:3 за Барселона.
Почетокот на денешното „Ел Класико“ е во 16:15 часот.
