„Нашите во светот“ е насловен 50-тиот фестивал „Млад отворен театар“ кој од 19 до 25 ноември ќе се одржува во организација на Младинскиот културен центар. МКЦ соопшти дека за јубилејното издание на МОТ подготвиле внимателно селектирани претстави, концерти и изложба и дека оваа година во фокусот се македонските автори кои „успешно создаваат надвор од границите на државата и во низа половина век постојано отвораат на нови сценски хоризонти“.
-Јубилејното издание ја слави интернационалната видливост на македонската театарска мисла и ја истакнува вредноста на уметниците кои потекнуваат од нашата културна средина, а се етаблирале во европски и регионални театри. МОТ во 2025 година ќе ги донесе на домашна сцена нивните најнови претстави, создадени во театарски куќи во регионот и пошироко, овозможувајќи им на гледачите да ги видат делата на нашите режисери, актери и сценски автори кои создаваат надвор, но со јасен печат на македонската уметничка школа, информира Русе Арсов во името на тимот на МКЦ.
Фестивалот ќе биде отворен со претставата „Лимениот барабан“ во режија и адаптација на Васил Христов, според истоимениот роман на Гинтер Грас, која е поставена на сцената на Југословенско драмско позориште во Белград каде што македонската екипа е проширена и со композиторот Никола Коџобашија и авторот на сценографија – Константин Трпеновски.
Арсов посочува дека преку отвореноста кон експериментот, иновацијата и интернационалната размена, фестивалот придонесе за создавање на едно од највиталните и најживи културни јадра во земјата и дека со „таква водилка се селектирани и останатите претстави кои ќе бидат изведени пред скопската публика“.
-Меѓу нив е претставата на Андреј Цветановски „Куќа на граница“ – поставена во Регионално позориште Нови Пазар, Србија, во која во авторската екипа се и Сергеј Светозарев, сценографија и костимографија, и Димитар Андоновски – композитор. Потоа претставите на Ѓорѓи Ризески – „Поручникот од Инишмор“, Адриана театар од Урошевац, Косово, на Јана Маричиќ – „Коштана“ поставена во Народното позориште во Ниш, Србија, на Ана Батева – „Кучето се засмеа“ која игра во Спам театар во Софија, Бугарија, на Совран Нрецај – „Граница“ во ОДА театар Приштина, Косово, на Искра Шукарова – „Врба“ и на Агнес Нокшиќи – „Слугинки“. Во придружната програма, публиката ќе може да ужива во е имерзивниот ВР перформанс на Нина Николиќ и Борјан Стојков со наслов „Ехо од длабочината”, како и концертите на музичките состави „Zwada” и “Тhis is not” од Косово, во рамките на МОТ Музички блок програмата, како и изложба на Константин Трпеноски, соопшти МКЦ.
Затворањето на фестивалот на 25 ноември ќе биде со претставата „Мајка храброст и нејзините деца“ во режија на Дејан Пројковски, во изведба на Новосадско позориште. Покрај Пројковски, како дел од авторската екипа, се и Олга Панго – кореографија, Валентин Светозарев – сценографија и Сергеј Светозарев – автор на плакатот.
Авторка на плакатот на 50. Млад отворен театар е Кристина Горовска. Целосната програма на фестивалот е достапна на официјалната страница.mk, каде што од денеска ќе може да се набават и онлајн-билетите за настаните на 50. МОТ.
