Американската глумица Кејт Хадсон привлече внимание со своето модно издание, придружувајќи му се на својот колега Хју Џекмен на прикажувањето на нивниот нов мјузикл „Тажно испеана песна“ (Song Sung Blue) во Берлин, Германија. Киноприкажувањето пред официјалната премиера се случи синоќа, објави порталот „Џаст-џејрд“.
Хадсон ја глуми Клер Сардин во претстојната драма, па на црвениот тепих се појави во исклучително елегантен, син проѕирен фустан со длабоко деколте, во креација од Вера Ванг. Впечатливата тоалета се издвојуваше со пуфкасти ракави и, отворен грб. Под проѕирниот фустан, таа носеше црн градник и свиленкасти сини куси бермуди, коишто според модните познавачи, дополнително го нагласија нејзиниот моден стил.
View this post on Instagram
Својот изглед, таа го комплетираше со обетки со скапоцени камчиња од Никос Кулис, прстен од Дејвид Јурман и чевли на платформа. Косата ѝ беше собрана во елегантна пунџа. Нејзиниот партнер од филмот, Хју Џекмен (57) се одлучи за класична елеганција, појавувајќи се во црно одело и бела кошула.
Филмот „Тажно испеана песна“, заснован на вистинска приказна, ги следи двајца музичари кои основаат имитаторски бенд – дуо посветено на Нил Дајмонд и преку музиката ја откриваат својата љубов, нови можности и шанса конечно да ги остварат своите соништа.
Филмот ќе се прикажува во киносалите ширум светот на Божиќ, 25 декември и потоа. Просечната оценка на ИМДБ засега е 7,2 /10, од вкупно 133 гледачи кои го оцениле филмот.
