Криптовалутите имаа тежок ноември, а негативниот тренд продолжува и во декември, што дополнително ги засилува стравувањата од пошироки турбуленции и на светските финансиски пазари.
Цената на Bitcoin падна за околу 7 отсто во последните 24 часа, спуштајќи се од нешто под 92.000 долари на приближно 85.000 долари. Острата распродажба започна доцна во неделата, со отворањето на тргувањето во Азија, кога за само неколку часа вредноста на биткоинот се намали за повеќе од 4.000 долари, пишува Си-Ен-Ен.
Јапонија како тригер за паниката
Во последните недели, биткоинот бележи силни осцилации, паралелно со зголемената воздржаност кон ризик на финансиските пазари. Најновата нестабилност, според аналитичарите, е поврзана со сигналите на Bank of Japan дека би можела да ги зголеми каматните стапки на својата претстојна седница.
Ова директно ја нарушува т.н. „yen carry trade“ стратегија – долги години користена од глобалните инвеститори – која се базира на земање евтини заеми во јапонски јен и инвестирање во повисокодоходовни средства, како американски акции или криптовалути. Со растот на каматните стапки, јенот зајакнува, заемите стануваат поскапи, а профитабилноста на оваа стратегија се намалува.
Како резултат, трговците почнуваат да продаваат биткоин и акции за да ги покријат обврските и да ги ограничат загубите, што дополнително ја суши ликвидноста на пазарите.
Притисок и врз Волстрит
„Ова отвора прашање за расплетување на yen carry trade стратегијата, што би извлекло ликвидност од системот – а тоа не е добро за берзите“, изјави Мет Мејли, главен пазарен стратег во Miller Tabak + Co.
Американските акции во понеделникот забележаа умерени загуби. Индексот Dow Jones Industrial Average падна за 0,42 отсто или околу 200 поени, S&P 500 се намали за 0,18 отсто, а технолошкиот Nasdaq Composite загуби 0,14 отсто. Паралелно со тоа, падот се прошири и на криптопазарот – ether, втората најголема криптовалута, потона за речиси 10 отсто.
Биткоинот далеку од рекордите
Новата корекција доаѓа само неколку недели по уште поостар пад кон крајот на ноември, кога биткоинот се спушти до нешто над 80.000 долари. Тоа претставува пад од околу 35 отсто во однос на рекордното ниво од над 126.000 долари, достигнато на почетокот на октомври.
Тој пад се прелеа и врз акциите, особено технолошките. S&P 500 во еден момент во ноември изгуби речиси 5 отсто, пред делумно да се стабилизира, додека Nasdaq го забележа првиот месечен минус од март годинава.
Бегство кон „сигурни засолништа“
Како одраз на зголемената неизвесност, инвеститорите повторно се насочуваат кон златото и среброто. Цената на среброто достигна рекордно ниво, поттикната од зголемената побарувачка како сигурно засолниште, но и од растечката индустриска употреба. Цените на среброто годинава се речиси удвоени.
Поддржувачите на биткоинот велат дека ваквата нестабилност е составен дел од неговиот развој, додека критичарите посочуваат дека криптовалутата не успева да ја исполни улогата на стабилно средство за зачувување вредност. Од почетокот на годината, биткоинот е во пад од околу 9 отсто, додека S&P 500 порасна за близу 16 отсто, а златото за повеќе од 60 отсто.
Клучен момент за крајот на годината
Иако S&P 500 е помалку од 2 отсто под своите историски максимуми, аналитичарите предупредуваат дека пазарите сè уште не се надвор од ризик. Историски гледано, декември е силен месец за берзите, а Волстрит се надева дека Federal Reserve ќе ги намали каматните стапки, што би можело да даде поддршка за раст.
Сепак, комбинацијата од биткоин што останува повеќе од 30 отсто под својот рекорд и продолжената неизвесност околу јапонската монетарна политика сугерира дека претстојниот период би можел да донесе зголемена нестабилност.
„Сè уште сме на клучна раскрсница за берзата“, оценува Мејли. „Развојот на ситуацијата во Јапонија создава дополнителна неизвесност за крајот на годината – а сигналите дека опасноста е помината сè уште не се јасни.“
Редакција Фронтлајн
