Сончевата светлина е најмоќниот природен извор за создавање витамин Д, но не е доволен извор за сите, во сите услови. Најновите анализи во медицината покажуваат дека количината на витамин Д што телото ја произведува зависи од огромен број фактори, меѓу кои сезона, географска ширина, време од денот, облачност, тип на кожа, ниво на загадување, па дури и годините. Затоа, иако сонцето е клучно, не може секој човек континуирано да добие оптимално ниво само од изложување.
На пример, во зимските месеци над 35° северна географска ширина (каде што спаѓа и Македонија), UVB зраците се премногу слаби за телото да синтетизира доволно витамин Д, без разлика колку време поминуваме надвор. Дополнително, користењето креми со висок заштитен фактор, работа во затворени простории, облека што покрива поголем дел од телото и природната пигментација на кожата значително ја намалуваат продукцијата.
Затоа, иако сончевата светлина е важен механизам, научните препораки сè почесто укажуваат дека не е реалистично секој човек – особено во Европа – да постигне оптимални вредности на витамин Д само преку сонце. Во такви случаи, исхраната (на пр. масна риба, јајца, обогатени производи) или дополнителна суплементација, по совет со лекар, стануваат нужни за одржување на здрави нивоа.
Мит или Вистина
Не – за повеќето луѓе сонцето НЕ е доволен единствен извор за витамин Д низ целата година.
Извор: Harvard T.H. Chan School of Public Health – Vitamin D and Health
Редакција Фронтлајн
