Американскиот државен секретар Марко Рубио донесе одлука да го врати Times New Roman како стандарден фонт за сите службени документи на Стејт департментот, објави Reuters. Со овој чекор се укинува промената воведена во 2023 година за време на администрацијата на Џо Бајден, кога официјалниот фонт беше заменет со Calibri.
Промената од 2023 година ја иницираше тогашниот државен секретар Ентони Блинкен, врз основа на препорака од интерни групи за различност и пристапливост, објави тогаш CNN. Целта беше зголемување на читливоста и пристапноста на службените документи и веб-страници.
Calibri, како sans serif фонт, содржи почисти форми без дополнителни линии околу буквите и, според некои експерти, може да биде полесен за читање за лица со дислексија или нарушен вид.
Американските ADA стандарди за пристапливост препорачуваат употреба на sans serif типографија, но Американската психолошка асоцијација смета дека читливи се и некои serif фонтови како Times New Roman, особено затоа што корисниците на асистивни технологии можат сами да го приспособат изгледот на буквите.
Во објаснувањето на новата одлука, портпарол на Стејт департментот изјави дека:
„Сериф фонтовите остануваат стандард во судовите, законодавните тела и низ федералните агенции каде што трајноста и авторитетот на пишаниот запис се од најголема важност.“
Со враќањето на Times New Roman, од 10 декември 2025 година сите дипломатски белешки, службени известувања и интерни документи повторно мора да го користат традиционалниот serif фонт кој долго време важеше за институционален стандард.
Редакција Фронтлајн
