Министерството за животна средина и просторно планирање (МЖСПП) информира дека во функција е нов веб портал за следење на квалитетот на воздухот, достапен преку постоечката адреса air.moepp.gov.mk, на кој граѓаните и институциите можат да ги следат податоците од сите мониторинг станици во државата во реално време.
„Би сакале да Ве информираме дека во функција е нов веб портал за квалитет на воздухот на МЖСПП на кој што може да пристапите преку постоечката адреса https://air.moepp.gov.mk. Податоците од сите мониторинг станици како и досега може да ги гледате во реално време“, се наведува во соопштението од Министерството.
Како новитет, од МЖСПП посочуваат дека податоците на порталот сега се споредуваат со новиот индекс за квалитет на воздух, кој е усогласен со Европскиот индекс и кој официјално започна со примена од 4 јули 2025 година.
„Новитет е тоа што истите се споредуваат со новиот индекс, кој е во согласност со Европскиот индекс за квалитет на воздух кој започна со примена од 04 јули 2025 година“, информираат од Министерството.
Од МЖСПП додаваат дека новата веб-страница има подобрени перформанси и напредни аналитички можности, особено во делот на следење на надминувањата на граничните вредности во тековната година, како и преку годишни анализи за претходните години.
Покрај веб порталот, Министерството информира дека е пуштена и мобилна апликација за приказ на податоците за квалитетот на воздухот, достапна за корисниците на Андроид и iOS уреди.
„Исто така е пуштена и мобилна апликација за приказ на податоците за квалитет на воздух за Андроид и iOS, чии што линкови за превземање може да ги најдете на веб страната“, се наведува во соопштението.
