Социјалдемократскиот сојуз на Македонија обвини дека најавеното поскапување на електричната енергија е директна последица на, како што наведуваат, криминалните тендери и неспособното управување со енергетскиот сектор од страна на Владата предводена од ВМРО-ДПМНЕ.
„Поскапувањето на струјата е нов удар врз и онака нискиот животен стандард на граѓаните“, се вели во соопштението на СДСМ, во кое партијата посочува дека лошото раководење со секторот енергетика ја турнало државата во енергетска криза, а цената повторно ја плаќаат граѓаните.
Од СДСМ директно ја посочуваат министерката Сања Божиновска, обвинувајќи дека за само година и половина државната електрани ЕСМ е доведена до, како што велат, состојба на колапс. Според нивните наводи, производството на електрична енергија е на историски најниско ниво – од планираните 5.000 GWh не се произведени ниту 3.000 GWh.
Поради недостигот на домашно производство, Владата, според СДСМ, е принудена да купува увозна струја по значително повисоки цени. Наместо електрична енергија произведена по цена од 80 до 90 евра за мегават-час, државата купува струја по цена од околу 140 евра за мегават-час.
„Причината е иста како и кај другите случаи – тендери“, обвинуваат од СДСМ, наведувајќи примери за, како што велат, сомнителни јавни набавки, меѓу кои 161 тендер доделен на една фирма и исплата од 9 милиони евра на друга компанија со двајца вработени.
Според податоците што ги изнесува партијата, загубата на ЕСМ досега изнесува 77 милиони евра, а до крајот на 2025 година се очекува да надмине 100 милиони евра. Дополнително, ЕСМ има и околу 110 милиони евра долг по основ на кредити, што, според СДСМ, значи вкупен товар од околу 200 милиони евра кој паѓа на грбот на граѓаните.
„Затоа поскапе струјата. Граѓаните ја плаќаат сметката за криминалните тендери и епската неспособност“, се наведува во соопштението.
Од СДСМ прашуваат дали Владата ќе се обиде да го оправда поскапувањето со нови анкети или, како што велат, со нови дефокусирања, и порачуваат дека одговорност мора да има.
„Работата не е завршена“, порачуваат од опозициската партија.
