Од канализирање на лутината до пеење – девет научно потврдени начини за подобро психичко здравје
По празничниот период исполнет со уживање, храна и опуштање, многумина го доживуваат почетокот на новата година како можност за „ресетирање“ – обид да се остават грижите зад себе и светот да се погледне од поинаков агол. Но, иако е лесно да си ветиме дека ќе размислуваме поинаку, многу потешко е тоа навистина да го примениме.
Добрата вест е дека науката нуди конкретни, докажани начини за подобрување на расположението и благосостојбата. Од прифаќање на несовршеноста, преку користење на мобилниот телефон на попаметен начин, до пеење и кратки дремки – истражувањата покажуваат дека малите промени можат да имаат голем ефект, пишува Би-Би-Си.
Откажете се од перфекционизмот
Перфекционизмот често се смета за доблест, но сè повеќе истражувања го поврзуваат со депресија, анксиозност, нарушувања во исхраната, несоница и дури зголемен ризик од самоубиство. Перфекционистите си поставуваат нереални стандарди и кога неизбежно нема да ги исполнат, се соочуваат со силно чувство на вина и срам.
Една од најсилните заштити од ваквите состојби е самосочувството – способноста да се однесуваме кон себе со истата добрина како кон другите. Наместо автоматска самокритика по грешка, психолозите советуваат прифаќање на несовршеноста како дел од човечкото искуство.
Градете поздрави пријателства
Квалитетните пријателства имаат силно влијание врз здравјето – од имунитетот до ризикот од срцеви заболувања. Но, не се важни само луѓето околу нас, туку и начинот на кој ние се однесуваме кон нив.
Истражувањата покажуваат дека таканаречените „амбивалентни односи“, во кои некој е „топол“ еден ден, а „ладен“ следниот, можат да бидат поштетни од отворено негативни односи. Едноставен чекор кон подобри релации е искрено да се радуваме на туѓи успеси – да поставуваме прашања, да покажеме интерес и да споделиме радост.
Започнете социјално хоби
Никогаш не е доцна за ново хоби. Активности како цртање, танцување или тимски спортови не само што го подобруваат расположението, туку создаваат и социјална поврзаност. Кај тимските спортови, заедничката цел создава чувство на блискост и ја прави физичката активност попријатна.
Истражувањата покажуваат дека ваквите активности можат да го намалат стресот и да ја подобрат психичката благосостојба, дури и кај луѓе кои не се сметаат за „талентирани“.
Насочете ја лутината, не ја потиснувајте
Лутината има лоша репутација, но нејзиното потиснување може да биде опасно – се поврзува со зголемен ризик од срцев удар. Наместо тоа, експертите советуваат канализирање на енергијата што ја носи лутината.
Физичка активност, креативна работа или упорност во решавање проблеми се начини на кои негативната емоција може да се претвори во продуктивна сила. Клучот е контролата – препознавање на емоцијата пред да прерасне во агресија.
Бројте ги добрите нешта
Запишувањето на три работи за кои сте благодарни секој ден е едноставна, но исклучително моќна практика. Истражувања покажуваат дека луѓето кои ја практикувале оваа навика за само еден месец пријавиле повисоко ниво на среќа и помалку депресивни симптоми.
Важно е не само да се запише што било добро, туку и зошто тоа било позитивно искуство.
Искористете го телефонот паметно
Иако прекумерната употреба на телефонот може да влијае негативно врз вниманието и сонот, истражувањата покажуваат дека технологијата може и да помогне. Апликациите за белешки, на пример, можат да го „растоварат“ мозокот.
Едноставни чекори како групирање на нотификациите или оставање на телефонот во друга просторија можат значително да го намалат менталниот замор.
Прифатете ја зимата
Темните и студени месеци често влијаат врз расположението, но истражувањата покажуваат дека промената на перспективата може да помогне. Луѓето кои ги прифаќаат позитивните страни на зимата – природната убавина, интимноста, дружењето – имаат подобро психичко здравје.
Пејте почесто
Пеењето активира повеќе делови од мозокот истовремено и делува како природен антистрес. Групното пеење дополнително ја зголемува психолошката благосостојба, а физичкиот напор е споредлив со брзо одење.
Одвојте време за кратка дремка
Кратките дремки од 5 до 15 минути можат веднаш да ја подобрат концентрацијата и менталната острина. Истражувањата покажуваат дека редовното дремење може да го забави стареењето на мозокот за неколку години.
Најдобро време за дремка е помеѓу 14 и 16 часот, а клучно е да не се претера со времетраењето.
Редакција Фронтлајн
