Премиерот Христијан Мицкоски денеска изјави дека Владата продолжува со, како што рече, јасно дефинирана про-семејна политика, чиј фокус се децата, семејството и создавање услови за најмладите.
„Втор ден во овој дел од Македонија и втор ден со убава вест – повторно детска градинка. Како Влада продолжуваме да создаваме услови за најмладите, за нашите деца, кои се иднината на државата и нацијата“, изјави Мицкоски при пуштањето во употреба на надградбата на постојната детска градинка во Таринци, Општина Карбинци.
Тој нагласи дека Владата ќе промовира, како што рече, про-семејни вредности, кои, според него, претставуваат темел на државата и општеството, додавајќи дека други вредносни концепти оваа влада нема да ги промовира.
Мицкоски потсети и на мерките во делот на демографската политика, наведувајќи дека бројот на бесплатни ин витро процедури е зголемен од три на шест, како и дека продолжува процесот на отворање нови градинки со цел целосно да се елиминираат листите на чекање, обврска предвидена во владината програма.
„Вчера беше Кочани, каде по долг период беше отворена градинка со капацитет за 114 деца. Денеска е оваа надградба во Таринци за околу 50 нови деца, а утре отвораме градинка и во Сопиште“, рече премиерот, најавувајќи дека ваквите проекти ќе продолжат и во наредниот период.
Тој ја спомена и содржината на учебниците за првоодделенците, во кои, како што рече, семејството е дефинирано како „мајка, татко, сестра, брат и јас“, оценувајќи дека на тој начин Владата јасно ги дефинира своите политики.
Премиерот им се заблагодари на градоначалникот, на Министерството за социјална политика, демографија и млади, како и на локалната администрација и советниците, оценувајќи дека надградбата на градинката во Карбинци е реализирана во рекордно краток рок.
„Иднината се децата и во таа насока ќе продолжиме да ги водиме политиките“, порача Мицкоски.
