СДСМ реагираше на новогодишното интервју на премиерот Христијан Мицкоски, обвинувајќи го дека продолжува со реторика на поделба, навреди кон граѓаните и копирање на политички модели од Србија, кои, како што велат, водат кон изолација, конфликти и авторитарно владеење.
„Откако граѓаните на Македонија ги квалификуваше како ‘талог на општеството’, Мицкоски во интервјуто ги нарекува сите неистомисленици ‘медиокритети’, продолжувајќи ја кампањата на омраза и поделба“, се наведува во реакцијата.
Според СДСМ, ваквиот начин на комуникација е преземен од моделот на српскиот претседател Александар Вучиќ и СНС, кој, како што оценуваат, довел до длабока поларизација и конфликт во српското општество, со единствена цел – зачувување на власта преку стратегијата „подели па владеј“.
Во реакцијата се посочува и на тврдењата на Мицкоски за наводна „кампања за мигранти“, зад која, според него, стоеле странски сили. СДСМ критикува што премиерот не понудил никакви докази, туку, како што велат, информациите наводно ги споделил само со својот „загрижен пријател“ Виктор Орбан.
Од СДСМ наведуваат дека ваквите блиски односи со контроверзни политички лидери се дополнителна причина за загриженост, особено по усвојувањето на Законот за Западен Балкан во САД, потпишан од претседателот Доналд Трамп, кој има посебен фокус на борбата против криминалот и корупцијата во регионот.
Партијата ја споредува ситуацијата и со односите меѓу Вучиќ и венецуелскиот претседател Николас Мадуро, посочувајќи дека против вакви десничарски лидери се отвораат сериозни случаи за криминал и корупција. Во тој контекст, се споменува и унгарскиот премиер Виктор Орбан, кого, како што наведуваат, Европската унија го обвинува за корупција, а за кого анкетите во Унгарија покажуваат можен изборен пораз.
„Изјавите на Мицкоски за мигрантите и странските влијанија се уште еден доказ за copy-paste кампањата на Вучиќ и СНС. Следно, очекуваме да почне да обвинува земји од ЕУ, па можеби и Русија, по примерот на наративот за ‘обоена револуција’“, стои во реакцијата.
СДСМ предупредува дека обвинувањата за вмешаност на странски држави, заедно со усвојувањето закони за обвинителството и судството кои, според нив, водат кон целосна контрола врз институциите, ја оддалечуваат Македонија од европскиот пат. Дополнително, се критикува заострувањето на односите со Бугарија и, како што велат, заробувањето на правната држава.
Партијата остро реагира и на најавите за купување нов владин авион, додека премиерот истовремено тврди дека Македонија е меѓу најсиромашните земји во Европа, како и на, како што наведуваат, луксузниот животен стил на Мицкоски.
Во завршницата, СДСМ порачува дека доколку Мицкоски навистина сака борба против криминалот и корупцијата, „прво треба да се уапси себеси“, наведувајќи дека докази, според нив, има доволно.
„Нека почне од скандалите со 161 тендер за свој близок соработник, па да продолжи по листата на Антикорупцискиот тим на СДСМ. Само така ќе покаже дека верува во правосудството и во реформите“, се вели во реакцијата.
Според СДСМ, најавите за предвремени избори нема да бидат избори за нов мандат, туку „референдум меѓу европска иднина и криминал и корупција“.
Мицкоски: Ги реализиравме сите цели – платите се зголемуваат, а сиромаштијата се намалува
Премиерот и претседател на ВМРО-ДПМНЕ, Христијан Мицкоски во интервју за Вечер.мк истакна дека Владата во изминатата година и половина ги реализирала сите зацртани цели, а во многу сегменти направила и повеќе од првично планираното, како резултат на реалните и итни состојби со кои се соочила државата.
