Администрацијата на американскиот претседател Доналд Трамп ќе се повлече од десетици меѓународни организации, вклучително и агенцијата на Обединетите нации за население и клучниот договор на ОН што ја поставува основата за глобалните климатски преговори, со што Соединетите Држави го продолжуваат своето повлекување од мултилатералната соработка, јавува AP News.
Претседателот Трамп потпиша извршна уредба со која се суспендира американската поддршка за 66 организации, агенции и комисии, откако претходно ѝ наложи на администрацијата да го преиспита учеството и финансирањето на сите меѓународни тела, вклучително и оние поврзани со Обединетите нации.
AMERICA FIRST 🇺🇸
Today, President Donald J. Trump signed a Presidential Memorandum directing the withdrawal of the United States from 66 international organizations that no longer serve American interests including:
🔴35-non UN organizations
🔴31 UN entities pic.twitter.com/72pTyV811N— The White House (@WhiteHouse) January 7, 2026
Повлекување од глобалната сцена
Најголемиот дел од институциите од кои САД се повлекуваат се агенции, комисии и советодавни тела поврзани со Обединети нации, кои се занимаваат со климатски политики, работнички права и други прашања што администрацијата на Трамп ги квалификува како дел од „woke“ агенда и политики на различност.
Во соопштението на Стејт департментот се наведува дека овие институции се оценети како „сувишни, лошо управувани, непотребни, расипнички, лошо водени или заробени од интересни групи што промовираат агенди спротивни на американските интереси“, како и дека дел од нив претставуваат закана за суверенитетот, слободите и општиот просперитет на САД.
Овој чекор е дел од поширок тренд на американско повлекување од меѓународни организации. Претходно, администрацијата ја прекина поддршката за Светска здравствена организација, агенцијата на ОН за палестински бегалци UNRWA, Советот на ОН за човекови права и UNESCO. Наместо сеопфатен пристап, Вашингтон применува селективна политика, поддржувајќи само оние тела што се сметаат за усогласени со агендата на Трамп.
„Мој начин или никако“
„Мислам дека сведочиме на кристализација на американскиот пристап кон мултилатерализмот, кој во суштина гласи: ‘мој начин или никако’“, изјави Даниел Форти, виш аналитичар за ОН во Меѓународна кризна група. „Тоа е многу јасна визија за меѓународна соработка – но исклучиво под условите на Вашингтон.“
Под удар климата и популациските прашања
Особено значајно е повлекувањето од Рамковна конвенција на ОН за климатски промени – договор од 1992 година меѓу 198 држави, кој претставува основа за Парискиот климатски договор. Трамп, кој климатските промени јавно ги нарекува „измама“, се повлече од Парискиот договор веднаш по враќањето во Белата куќа.
Научниците предупредуваат дека ваквиот потег може сериозно да ги наруши глобалните напори за намалување на емисиите на стакленички гасови. „Ова им дава изговор на други држави да ги одложат сопствените обврски и акции“, изјави Роб Џексон, климатски научник од Универзитет Стенфорд.
Агенцијата на ОН за население, која обезбедува услуги за сексуално и репродуктивно здравје ширум светот, со години е мета на критики од републиканците. Трамп го укина нејзиното финансирање и во својот прв мандат, обвинувајќи ја за учество во „присилни практики на абортус“ во земји како Кина – тврдења кои подоцнежните ревизии на Стејт департментот не ги потврдија.
Долг список на напуштени организации
Меѓу другите тела од кои САД ќе се повлечат се Пактот за енергија без јаглерод, Универзитетот на Обединетите нации, Меѓународниот советодавен одбор за памук, Меѓународната организација за тропско дрво, Панамериканскиот институт за географија и историја, Меѓународната федерација на уметнички совети и културни агенции, како и Меѓународната студиска група за олово и цинк.
Од Стејт департментот информираат дека ревизиите продолжуваат, што остава отворена можност списокот на организации од кои САД ќе се повлечат дополнително да се прошири.
Трамп блокираше повеќе од 10 милијарди долари социјалните грантови во неколку сојузни држави
Претходно, вчера. администрацијата на американскиот претседател Доналд Трамп замрзна повеќе од 10 милијарди долари наменети за грижа за деца и помош на семејствата во сојузните држави Калифорнија, Колорадо, Илиноис, Минесота и Њујорк. Како причина за ваквиот чекор, американското Министерство за здравство наведе сомнежи за измами и злоупотреби.
Од стапувањето на должност, администрацијата на Трамп неколкупати се закани со кратење на федералното финансирање на организации и сојузни држави поради низа прашања – од наводни измами во програмите на државите под водство на Демократите, до иницијативи за различност и пропалестински протести на универзитетите против израелските напади во Газа.
Редакција Фронтлајн
