Со одлуката на Соединетите Американски Држави за суспендирање на обработката на визи, Македонија се најде во иста група со земји како Сомалија, Сирија, Иран и Русија, што е директна последица на погрешните и штетни политики на актуелната власт, соопштија денеска од СДСМ.
На прес-конференција, членот на Извршниот одбор на СДСМ, Јон Фрчкоски, оцени дека периметарот околу премиерот Христијан Мицкоски ја довел државата во состојба на меѓународна изолација и сериозно го нарушил стратешкото партнерство со САД.
„Последната одлука на САД е Македонија да биде опфатена со суспендирање на обработката на визи, заедно со уште 75 земји, меѓу кои Сомалија, Сирија, Гана, Руанда, Бутан, Нигерија, Иран и Русија. Ова е алармантен сигнал за тоа каде не однесе периметарот на Мицкоски“, изјави Фрчкоски.
Тој потсети дека ова не е прв негативен чекор од страна на САД во однос на Македонија во последниот период.
„Минатата година САД ги зголемија царините кон Македонија, а сега, од 21 јануари, се суспендира и обработката на визи. Тоа е директна последица на погрешните политики на тендер коалицијата ВМРО-ЗНАМ, која го загрозува стратешкото партнерство со САД и интеграцијата во ЕУ“, рече Фрчкоски.
Според него, особено загрижувачки е влијанието на проруски ориентирани функционери во Владата.
„Најблизок соработник на Мицкоски во Владата е Иван Стоилковиќ, кој има отворени проруски ставови и директни врски со Москва. Пред само неколку дена го видовме како слави заедно со таканаречените ‘Ноќни волци’, група блиска до Путин“, изјави Фрчкоски.
Тој додаде дека паралелно со, како што рече, антиамериканските активности, Владата води и систематска анти-ЕУ кампања.
„Се продуцираат намерни судири со Грција и Бугарија, се отвораат веќе затворени прашања, се измислуваат изговори за да се оправда изолацијата и блокирањето на преговорите со ЕУ. Не се спроведуваат никакви реформи и Македонија се турка кон целосна изолација“, нагласи тој.
Фрчкоски оцени дека во владејачките структури владее паника поради најавените чекори од страна на САД.
„САД носат специјален закон за Западен Балкан, насочен директно кон борбата против криминалот и корупцијата. Ова се само првите чекори што ги гледаме. Следуваат и црни листи, а се најавуваат и можни санкции“, предупреди Фрчкоски.
Тој порача дека СДСМ ќе продолжи јавно да ја разоткрива, како што рече, оваа агенда.
„Наши стратешки пријатели се САД, а местото на Македонија е во НАТО и во Европската Унија. Од ова нема отстапување“, заклучи Фрчкоски.
