Ниту еден градски функционер од Чачак, Србија, синоќа не бил присутен на плоштадот, на бината, ниту покрај Ана Бекута – тие се повлекле, а фактички, СНС синоќа ја жртвуваше Ана Бекута, изјави за N1 активистката Славица Петровска на вчерашниот протест пред Вишото јавно обвинителство.
Граѓаните на Чачак, се собраа во 19 часот пред Вишото јавно обвинителство, откако неколку граѓани беа приведени поради инциденти за време на синоќешниот концерт на Ана Бекута во градот.
Петровска смета дека нема никаква основа граѓаните да бидат сослушувани како осомничени во овој случај, иако, како што наведува, шест лица веќе биле приведени на распит по концертот.
„Луѓето излегоа и се гаѓаа со снежни топки – не знам кој закон може да го забрани тоа. Дополнително, ако во изминатата година видовме дека во оваа држава претседателот може да каже дека жена која тргнала со нож кон деканка во Ниш е ‘прекрасна госпоѓа’, или дека момци кои ѝ скршиле вилица на девојка во Нови Сад се негови херои, тогаш навистина не знам што се случува овде. Зарем гаѓање со снежни топки да биде кривично дело? Тоа е невозможно. Сметам дека сето ова е обид да се заплашат други градови да не бидат како Чачак“, изјави Петровска.
Таа додава дека синоќешното изразување на незадоволство било протест против издвојувањето 40.000 евра за концертот на Ана Бекута.
„Целта беше да го покажеме нашиот бунт против трошењето на тие пари од градскиот буџет и ништо повеќе. Ден претходно апелиравме и најавивме што ќе се случи – не нè интересира кој пее. До синоќешните провокации немавме ништо против госпоѓата Бекута, ниту против кој било друг изведувач. Градската власт кон крајот на декември објави дека оваа година нема да има дочек и дека парите ќе се искористат попаметно, а на 8 јануари потпишаа договор и исплатија 4,5 милиони динари за бината и другите трошоци“, објасни Петровска.
Таа наведува и дека однесувањето на Ана Бекута дополнително ги разгневило граѓаните, особено моментите кога од бината им наредувала на полицајците што да прават, со што, според неа, пејачката „ја понижи чачанската полиција“.
„Очекував Александар Вучиќ и Ана Бекута најостро да ги осудат градските власти на Чачак, бидејќи синоќа ниту еден градски функционер не беше ниту на плоштадот, ниту на бината, ниту покрај Ана Бекута. На полноќ никој не излезе да ни ја честита Новата година. Тие се повлекоа и фактички, СНС синоќа ја жртвуваше Ана Бекута“, заклучи активистката од Чачак.
